Eldingar í Grímsvatnagosi í nóvember 2004
Heim > Veðurathuganir > Eldingar > Grímsvatnagos       English

Mikið var um eldingar í Grímsvatnagosi fyrstu 36 tímana.

	Mynd 1 sýnir kort með staðsettum eldingum í gosinu. Notuð eru gögn úr breska ATD staðsetningarkerfinu, en það staðsetti 251 eldingu frá 2. nóv. 2004 kl. 01:45 til 3. nóv. kl. 08:50.
	Mynd 2 sýnir tímasetningu eldinga frá 1. nóvember 2004, kl. 21:50 er gosið hófst og straumstyrk eldinganna eins og hann mældist á LLP eldingamælistöðinni á Syðri-Neslöndum við Mývatn. Hver elding er auðkennd með lóðréttu striki frá núlllínunni. Eins og sjá má voru fyrstu skráðu eldingarnar kl. 01:37 aðfararnótt 2. nóv., mesta hrinan kl. 02:30-04:10, síðan kom hlé frá kl. 07 til 13:30, en þá hófst hrina aftur. Athyglisvert er að straumstyrkur hefur heldur lækkað. Neikvæður straumstyrkur táknar að hleðsla í gosmekki er neikvæð miðað við jörð.
	Mynd 3 sýnir hæð á gosmekkinum (yfir sjávarmáli) eins og hann hefur verið metinn á 5 mín fresti með veðursjá Veðurstofunnar á Miðnesheiði, í um 260 km fjarlægð. Þar sem mökkurinn sést ekki á ratsjármynd er settur blár depill í 6 km hæð neðst á ritinu, sem er lágmark sem ratsjáin sér í þessari fjarlægð. Eins og sjá má tekur hæðin einungis gildin 9-10 eða 12-13 km og stafar það af því að ratsjáin tekur hallafleti í föstum skrefum og í raun er því engin mæling þarna á milli. Þessar hæðir jafngilda sjónarhornum 1° og 2° yfir sjóndeildarhring frá Miðnesheiði. Næsta hæð þarna fyrir ofan (3°) er um 17 km, sem mökkurinn hefur aldrei náð.

Athyglisvert er að sjá að samhengi virðist milli eldingavirkni og gosmakkarhæð og líklegt má telja að kraftur í gosinu ráði báðum þáttum.

Myndirnar sýna ekkert eftir 3. nóvember, en ekkert nýtt hefur bæst við.

15. nóvember 2004, kl. 11:45 - Þórður Arason