Vísindanefnd Sameinuðu þjóðanna (IPCC)
Á vegum Sameinuðu þjóðanna starfar vísindanefnd sem fjallar um loftslagsbreytingar. Á ensku heitir nefndin Intergovernmental Panel on Climate Change sem er skammstafað IPCC, en á íslensku er nefndin kölluð milliríkjanefnd Sameinuðu þjóðanna um loftslagsbreytingar. Nefndin hefur það hlutverk að taka saman vísindalegar, tæknilegar, félags- og efnahagslegar upplýsingar um grundvöll þekkingar á loftslagsbreytingum af mannavöldum. Úttektirnar fjalla um vísindalega þekkingu á loftslagsbreytingum af mannavöldum, um afleiðingar þessara breytinga og um aðlögun og viðbrögð til að sporna við þessum breytingum.
Úttektir eru gerðar á opinn og gagnsæjan hátt. IPCC stundar hvorki rannsóknir né eftirlit með veðurfari, heldur eru samantektir nefndarinnar að megninu til byggðar á faglegri ritrýni og á greinum sem birtar hafa verið í ritrýndum tímaritum.
Úttektir nefndarinnar eru unnar af þremur mismunandi vinnuhópum. Vinnuhópur eitt (WG1) fjallar um vísindalega þekkingu á veðurfari og loftslagsbreytingum. Vinnuhópur tvö (WG2) leggur mat á tjónnæmi (e. vulnerability) félags-, efnahags- og náttúrulegra kerfa, neikvæðar og jákvæðar afleiðingar loftslagsbreytinga og möguleika á aðlögun. Vinnuhópur þrjú (WG3) leggur mat á leiðir til að draga úr losun gróðurhúsalofttegunda og á aðrar leiðir til að koma í veg fyrir loftslagsbreytingar.
Á nokkurra ára fresti birtir vísindanefndin yfirlitsskýrslur, sem eru í raun ritröð um ástand þekkingar hverju sinni. Síðasta slík skýrsla kom út árið 2007 (s.n. fjórða yfirlitsskýrsla, á ensku Assessment Report 4 eða AR4). Útgáfa yfirlitsskýrslunnar á sér stað í nokkrum skrefum, en hver vinnuhópur gefur út sjálfstætt rit. Jafnframt því sem textinn að skýrslu hvers hóps er samþykktur er gefin út stutt greinargerð sem nefnd er „samantekt fyrir stefnumótendur" (Summary for Policymakers, SPM).
Snemma í febrúar 2007 skilaði WG1 frá sér sinni skýrslu og var samantektin (pdf 3,7 Mb) gefin út. Lesa má umfjöllun um samantektina hér á vefnum.
Snemma í apríl skilaði WG2 sinni skýrslu og var jafnframt gefin út samantekt (pdf 0,9 Mb) fyrir stefnumótendur. Útdrátt samantektarinnar sem unnin var á Veðurstofu Íslands má lesa hér á vefnum.
Vinnuhópur þrjú (WG3) skilaði sinni skýrslu í maí, og í nóvember var loks gefin út skýrsla sem inniheldur útdrátt úr hinum þremur (Synthesis Report SAR).
Þessar yfirlitskýrslur liggja til grundvallar umfjöllun um hnattrænar loftslagsbreytingar. Ítarlegan úrdrátt úr má finna í skýrslu vísindanefndar um loftslagsbreytingar. Skýrslurnar eru aðgengilegar í heild sinni á vefsvæði IPCC.
Milliríkjanefnd SÞ hlaut friðarverðlaun Nóbels árið 2007.
