Skýringar við veðurathuganir

Flestar veðurathuganir, sem hér birtast, eru gerðar á mönnuðum veðurathugunarstöðvum. Frá stöku stað berast þó athuganir gerðar með sjálfvirkum hætti og þar má búast við að aðeins fáir veðurþættir séu athugaðir.

Athugunartími: Athuganir frá íslenskum veðurathugunarstöðvum eru birtar átta sinnum á sólarhring (á miðnætti, kl. 3, 6, 9, 12, 15, 18 og 21) en athuganir frá erlendum veðurathugunarstöðvum eru birtar fjórum sinnum á sólarhring (á miðnætti, kl. 6, 12 og 18). Athugið að athugunartími er alltaf miðaður við samræmdan heimstíma (UTC) sem er sá sami og íslenskur staðaltími (ÍST). Þegar athugun er gerð á hádegi að íslenskum tíma er klukkan t.d. orðin 14 að staðartíma í Helsinki (15 á sumartíma) en hún er aðeins 6 að morgni í miðríkjum Bandaríkjanna. Af þessum sökum eru athuganir gerðar samtímis austan hafs og vestan ekki sambærilegar.

Vindátt: Með vindátt er átt við hvaðan vindur blæs og er miðað við réttvísandi áttir en ekki seguláttir.

Vindhraði er mældur í m/s. Tilgreindur er meðalvindhraði á 10 mínútum, mældur í 10 m hæð yfir jörð.

Veður er tilgreint ef vart hefur orðið við úrkomu, þoku, mistur, skafrenning eða önnur skyld veðurfyirbæri á athugunartíma eða á síðustu klukkustund fyrir athugun. Ef svo er ekki er skýjahula látin duga til að lýsa veðri.

Skyggni er mælikvarði á hve loftið er tært.

Orðin "gráð" og "ládautt" eru notuð í veðurathugunum til að lýsa sjólagi. Ládautt merkir sléttur sjór en gráð merkir fíngerðar gárur á vatni. Í veðurathugunum er það notað þegar ölduhæð er talin vera minni en 10 cm. Þau orð, sem notuð eru til að lýsa sjólagi eru eftirfarandi:

Hiti er mældur í 2 m hæð yfir jörð.

Daggarmark segir til um við hvaða hita loftið mettast þegar það er kælt og þrýstingi haldið stöðugum. Í mettuðu lofti er daggarmark jafnt hita en lægra en hiti í ómettuðu lofti. Raki í % (rakastig) er líklega sú rakamælieining sem einna best er þekkt en það segir til um hve nærri loftið er því að vera mettað af raka. Rakastig mettaðs lofts er 100% en 0% ef enga vatnsgufu er að finna í loftinu. Hæfni loftsins til að geyma raka er mjög háð hita. Þannig hækkar rakastig þegar loft er kælt þó að engri vatnsgufu sé bætt við.

Hámarkshiti og lágmarkshiti eru yfirleitt mældir tvisvar á sólarhring og gefa til kynna hvað hefur orðið hlýjast og kaldast frá síðustu mælingu. Á Íslandi eru slíkar mælingar gerðar kl. 9 að morgni og kl. 18 en í flestum öðrum löndum kl. 6 og kl. 18. Ef engin tala er í dálkunum um hámarks- og lágmarkshita táknar það að slíkar mælingar hafi ekki verið gerðar á þessum tíma.

Úrkoma er mæld kl. 9 og kl. 18 á íslenskum veðurathugunarstöðvum og er tilgreint magn úrkomu í mm frá síðustu mælingu (ýmist 9 eða 15 klst.). Í flestum öðrum löndum er úrkoma mæld á miðnætti, kl. 6, kl. 12 og kl. 18 þannig að úrkomutölur tákna mm á 6 klst. Ef engin tala er í úrkomudálki táknar það að úrkoma hafi ekki verið mæld á þessum tíma.

Loftþrýstingur er mældur í hPa (hektópaskal), en sú eining jafngildir mb (millibar) sem lengi hefur verið notað. Loftþrýstingur mældur á stöðinni er leiðréttur til sjávarmáls.