Skýringar
Mælingar á eldingum
Eldingar eru rafstraumur í gegnum loftið sem verður þegar hleðslumunur milli tveggja staða
er orðinn mjög mikill. Frá eldingunni berst öflug rafsegulbylgja til allra átta. Mælitæki
nema slík rafsegulhögg. Á vefsíðum Veðurstofunnar eru sýndar staðsettar eldingar úr sk. ATDnet
mælikerfi (Arrival Time Differences), en það er rekið af
bresku veðurstofunni UK Met Office.
Kerfið hefur verið rekið síðan 1988. Þeir reka allmargar mælistöðvar
í og umhverfis Evrópu. Stöðvarnar nema
lágtíðnirafsegulbylgjur frá eldingum (13,733 kHz) og skrá komutíma bylgnanna
með mikilli nákvæmni. A.m.k. fjórar stöðvar þurfa að nema eldingu svo hægt
sé að staðsetja hana. Kerfið nemur bæði skýjaeldingar og eldingar til
jarðar, þó það nemi eldingar til jarðar mun betur þar sem mælistöðvarnar mæla
lóðrétt rafsvið. Kerfið mælir hvorki straumstyrk eldinganna, leiftrafjölda
í eldingu, né pólun eldinga til jarðar.
Lýsingu á ATDnet mælikerfinu má finna í ráðstefnugrein.
ATDnet eldingamælistöð á Keflavíkurflugvelli
Í júlí 2002 var sett upp ATD Sferics eldingamælistöð í húsi
háloftastöðvar Veðurstofu Íslands á Keflavíkurflugvelli
(63°58,100'N, 22°36,850'V).
Á árinu 2007 var stöðin uppfærð í ATDnet stöð. Eldingastöðin er beintengd
til bresku veðurstofunnar þar sem unnið er úr mælingunum og þær bornar saman
við mælingar frá stöðvum í öðrum löndum. Eldingastöðin er í
eigu bresku veðurstofunnar, en fyrir aðstöðu og aðstoð við uppsetningu
og rekstur stöðvarinnar fær Veðurstofa Íslands aðgang að eldingagögnum
Bretanna.
|