Landsröð        Stafrófsröð        Eigendaröð        Veðurstöðvar

Skýringar við sjálfvirkar veðurathuganir sl. viku Viðvörun Athugið að ekki er búið að yfirfara mæligögnin. Þessi gögn eru mæld með sjálfvirkum mælum, sem geta bilað. Gögn eru sótt í stöðvarnar um síma á sjálfvirkan hátt. Í gögnunum geta því leynst mælivillur og villur í gagnasendingum. Hugsanlegt er einnig að villur séu í forritum sem vinna sjálfvirkt úr gögnunum og teikna línuritin. Vinsamlegast gætið að þeim tíma sem fram kemur við línurit. Glæðið síðurnar eftir þörfum. Ef síður uppfærast ekki þrátt fyrir endurglæðingu er líklegast að stillingar vafra séu í ólagi. Túlkið því línuritin með varúð! Línuritin Línuritin sýna annars vegar mæligildi síðustu viku (vikumyndir) og hins vegar mæligildi síðasta sólarhring (dagsmyndir). Við lárétta ásinn eru dagsetningar og/eða tímasetningar. Vikumyndirnar sýna lítil hök við ásinn á 12 klst fresti, dagsetning er merkt við hvern dag og lóðrétt punktalína við miðnætti. Á dagsmyndum er tímasetning merkt á 3 klst fresti og lóðrétt puntalína einnig á 3 klst fresti. Á vikumyndum eru einungis notuð gögn á 1 klst fresti, en fyrir dagsmyndir eru notuð mæligögn á 10 mín fresti ef þau liggja fyrir. Hvert línurit er kvarðað út af fyrir sig án tillits til annarra gagna þannig að mæligögnin komist öll inn á myndina. Hiti og daggarmark (°C) Lofthiti (rauður ferill) er mældur í um 2 m hæð yfir jörðu. Daggarmark (blár ferill) er reiknað út frá mælingu á rakastigi loftsins í um 2 m hæð yfir jörðu. Hiti við jörð (ljósgrænn ferill) er mældur á nokkrum stöðvum og er þar hitamælir um 5 cm fyrir ofan jörð. Snjór getur auðveldlega kaffært hitamæli við jörð. Það er yfirleitt auðþekkjanlegt, því þá verða allar hitabreytingar mjög hægar. Hiti við jörð verður þá hiti snævar. Rakastig (%) Rakastig loftsins er mælt í um 2 m hæð yfir jörðu og er sýnt með bláum ferli. Loftþrýstingur (hPa) Ljósgrænn ferill sýnir loftþrýsting umreiknaðan niður að sjávarmáli. Vindhraði og hviður (m/s) Á vikumynd sjást tveir ferlar; neðri ferillinn (rauður) sýnir hæsta 10 mín meðalvindhraða undanfarna klst og efri ferillinn (brúnn) sýnir hæstu 3 sek vindhviðu á hverri klukkustund. Á dagsmynd eru einnig tveir ferlar; 10 mín meðalvindhraði (rauður) og hæsta 3 sek vindhviða á hverjum 10 mín (brúnn). Vindmælingar fara yfirleitt fram í um 10 m hæð yfir jörðu. Vindátt (°) Sýnd er 10 mín meðalvindátt í gráðum réttsælis frá norðri. Vindátt sýnir úr hvaða átt vindurinn blæs. Þannig er 0° norðanátt, 90° austanátt, 180° sunnanátt, 270° vestanátt og 360° norðanátt. Vindáttarmælingin fer fram í um 10 m hæð yfir jörðu. Hægra megin við ritið eru vindáttir sýndar með bókstöfum (N A S V). Úrkoma (mm) Sýnd er uppsöfnuð úrkoma frá ótilgreindum tímapunkti. Hægra megin er sýndur kvarði sem sýnir úrkomu (mm) frá upphafspunkti línuritsins. Flestir úrkomumælarnir byggja á því að vigta fötu með úrkomunni og truflanir í vigtuninni geta leitt til þess að mæligildið lækki. Þegar fatan er tæmd þá lækkar gildið mikið. Aðrir mælar eru vippumælar og þá er ekki suð í mælingunni. Sólgeislun (W/m2) Sólgeislun á láréttan flöt er sýnd. Heildargeislun með mosagrænum ferli. Grár ferill sýnir reiknaða sólgeislun á láréttan flöt á heiðskírum degi miðað við að sólin gæfi 950 W/m2 á flöt sem sneri beint upp í sólina. Jarðvegshiti (°C) Jarðvegshiti á fjórum dýptum: 10 cm (grænn), 20 cm (ljósbrúnn), 50 cm (brúnn) og 100 cm (svartur). Snjódýpt (cm) Sýnd er snjódýpt við mælistöð. Geislunarstyrkur (nSv/klst) Mæld er jónandi geislun frá geislavirkum efnum á fjórum stöðvum í samstarfi við Geilsavarnir ríkisins. Geislaálag hefur eininguna Sv (Sívert). Jafnan er um að ræða náttúrulega geislun sem ekki telst skaðleg. Rafspenna (Volt) Fylgst er með rafspennu í mælistöð, en margar stöðvar ganga á rafgeymum og sólþilum. Eigendur sjálfvirkra veðurstöðva Veðurstofan á og rekur yfir 130 sjálfvirkar stöðvar en fær gögn frá stöðvum í eigu Landsvirkjunar (Lv), Landsnets (Ln), Vegagerðarinnar (Vg), Siglingastofnunar (Si) og nokkrum í eigu annarra. Mæligögn Hægt er að skoða gögnin í töfluformi sl. 4 sólarhringa þar sem þau eru sýnd á 1 klst fresti. Merkin U og A Með stöðvanöfnum í stafrófsröð yfir allt landið eru merkin U og A. Þar er hægt að fá upplýsingar um veðurstöðina með því að smella á U og skoða mæligögn í töfluformi með því að smella á A. Uppfærsla gagna Hringt er í flestar stöðvanna á 1 klst fresti og náð í nýjustu gögn. Línuritin eru uppfærð fljótlega eftir að gögnin berast í gagnagrunn Veðurstofunnar. Þórður Arason, 26. október 2019