Jarðskjálftayfirlit viku 9, 16. febrúar - 3. mars 2024
Tæplega 1650 skjálftar mældust á landinu í níundu viku ársins. Tæplega 870 skjálftar hafa verið yfirfarnir. Þessi mikla auknin frá því í síðustu viku stafar af kvikuhlaupi þann 3.mars frá Svartsengi yfir í kvikuganginn undir Sundhnjúksgígaröðinni. Að þessu sinni endaði kvikuhlaupið ekki í eldgosi líkt og gerðist í janúar og febrúar. Áframhaldandi landris mælist eftir kvikuinnskotið. Kvikuflæði undir Svartsengi heldur því áfram og líkanreikningar sýna að um hálf milljón rúmmetra af kviku safnast á sólarhring. Í heildina hafa um 9,5 milljón rúmmetrar af kviku safnast fyrir í kvikuhólfinu undir Svartsengi síðan í eldgosinu 8. febrúar. Þrýstingur í kvikuhólfinu heldur því áfram að byggjast upp og auknar líkur eru á nýju kvikuhlaupi yfir í Sundhnúksgígaröðina og jafnvel eldgosi á næstu dögum.
Nokkur virkni var bæði í Bárðarbungu og Grímsvötnum í vikunni og einnig hefur smáskjálftahrina verið í gangi við Húsmúla í Henglinum síðan 15. febrúar, en hrinuvirkni á því svæði er allvanaleg og þekkt er að niðurdæling á því svæði geti valdið skjálftum.
Nánar er fjallað um jarðhræringarnar nærri Grindavík í frétt á forsíðu sem er uppfærð reglulega.
Nánar má skoða skjálftavirkni hér: Skjálfta Lísa
Reykjanesskagi og Reykjaneshryggur
Tæplega
1190 skjálftar mældust á Reykjanesskaga í vikunni sem leið. Mest
var virknin í kvikuganginum eða eða um 620 skjálftar, flestir
undir tveimur að stærð. Hrina hófst þann 3.mars vegna
kvikuhlaups frá Svartsengi yfir í kvikuganginn. Kvikuhlaupið
endaði ekki í eldgosi líkt og gerðist í janúar og febrúar.
Stærsti skjálftinn í þeirri hrinu var 2.6 að stærð. Við
Fagradalsfjall mældust um 160 skjálftar sá stærsti var 1.5 að
stærð. Nokkur skjálftavirkni hefur verið á svæðinu milli
Keilis og austur fyrir Kleifarvatn, stærsti skjálftinn þar mældist
3.4 að stærð 26. febrúar um 2 km austur af Kleifarvatni. Af þeim
1190 skjálftum sem mældust hafa 640 þeirra verið yfirfarnir.
Um
þrír skjálftar mældust úti á hrygg, stærstur þeirra mældist
1.8 þann 27. febrúar og var staðsettur vestur af Eldey.
Suðurlandsbrotabeltið og Hengilssvæðið
Á Hengilssvæðinu mældust ríflega 220 skjálftar. Af þeim voru um 60 staðsettir í og við Húsmúla, þar sem hefur staðið yfir lítil skjálftahrina frá 15. Febrúar. Um 5 km norðvestur af Húsmúla mældust rúmlega 140 skjálftar. Stærsti skjálftinn var 2.6 að stærð. Skjálftavirkni á Suðurlandsbrotabeltinu var með eðlilegu móti, 30 skjálftar, allir litlir og mjög dreifðir.
Vesturgosbeltið og Mið-Íslandsgosbeltið
Einn skjálfti mældist norður af Þórisjökli þann 1.mars og mældist hann 2 að stærð.
Austurgosbeltið
Mýrdalsjökull
og Torfajökulssvæði
Í
Mýrdalsjökli
var virkni svipuð og undanfarnar vikur, 22 skjálftar, stærsti 2.8
að stærð. Þrír skjálftar mældust á Torfajökulssvæðinu en
þeir eru óyfirfarnir.
Vatnajökull
Í
Vatnajökli mældust 40 skjálftar og var virknin mest í kringum
Grímsvötn og Bárðarbungu. Í Bárðarbungu mældust tæplega 20
skjálftar, sá stærsti 1.5 að stærð 28. febrúar. Um 10
skjálftar voru í Grímsvötnum, stærsti skjálftinn mældist 2,7
að stærð. Restin af virkninni var dreifð um norðvestur hluta
Vatnajökuls.
Norðurgosbeltið
Askja og Herðubreið
Við Öskju mældust 17 skjálftar, allir undir 1.5 að stærð. Við Herðubreið mældust 36 skjálftar.
Krafla og Þeistareykir
Fjórir smáskjálftar mældust við Kröflu og tveir smáskjálftar við Bæjarfjall.
Tjörnesbrotabeltið
Alls mældust um 33 skjálftar á Grímseyjarbrotabeltinu og Húsavíkur-Flateyjarmisgenginu. Þar af 19 á Grímseyjarbrotabeltinu og 13 á Húsavíkur-Flateyjarmisgenginu.
