Spá um snjóflóðahættu

Mat á snjóflóðaaðstæðum

Á hálendinu og á jöklum landsins eru víða ennþá vetraraðstæður og sumstaðar talsverð snjóflóðahætta. Sleðamenn komu af stað flóði á hálendinu á mánudag og á fimmtudag í síðustu viku lentu tveir menn í snjóflóði í Grímsfjalli. Við ströndina er minni snjór, en þó er nýsnævi til fjalla á sumum stöðum eftir snjókomu á laugardag og sunnudag. Göngumaður lenti í snjóflóði í bröttu gili við Ísafjörð. 
Skrifað af vakthafandi sérfræðingi 22. maí 00:19

Snjóflóðaspá fyrir valin svæði

Norðanverðir Vestfirðir

Nokkur hætta

Á laugardag og sunnudag snjóaði til fjalla og bættust við um 20 cm af nýsnævi efst í fjöll. Fyrir var snjór í giljum og í efri hluta fjalla inn til landsins, en annars var víða orðið autt. Veikt lag er ofarlega í gamla snjónum og nýi snjórinn binst ekki vel við þann gamla. Göngumaður lenti í flóði í bröttu gili í Seljalandshlíð við Skutulsfjörð á mánudag. Líklega kom hann flekanum af stað sjálfur efst í gilinu. Sama dag létu skíðamenn vita af vúmp-hljóði í snjó á Hrafnseyrarheiði og Seljalandsdal. Óstöðugleikinn er líklega fyrst og fremst efst í fjöllum og nýi snjórinn í brekkum sem vísa í S og V. Ekki er búist við stórum flóðum, en það getur verið hættulegt að setja af stað lítil flóð á stöðum þar sem fall hefur alvarlegar afleiðingar. Á þriðjudag verður SA-átt og rigning, það getur þó snjóað efst í fjöllum. Á miðvikudag snýst í sunnan átt með skúrum og hugsanlega éljum til fjalla.
Gildir frá: 22. maí 15:30 - Gildir til: 25. maí 14:00

Utanverður Tröllaskagi

Nokkur hætta

Fyrstu tvær vikurnar í maí féllu nokkuð mörg flekaflóð til fjalla og sum þeirra af mannavöldum. Skíðamenn settu af stað vott flekaflóð á fimmtudag í síðustu viku, í 800 m hæð. Um helgina snjóaði til fjalla og lausaflóð féllu í sólinni á mánudag. Snjóþekjan er líklega frekar að styrkjast en enn ætti að reikna með að veikleikar geti verið í gamla snjónum.
Gildir frá: 22. maí 15:30 - Gildir til: 25. maí 14:00

Austfirðir

Lítil hætta

Snjór er talinn stöðugur að mestu en spýjur og hengjuhrun er mögulegt. Spáð er S-átt með úrkomu einkum sunnan til á Austfjörðum á þriðjudag og miðvikudag.
Gildir frá: 22. maí 15:30 - Gildir til: 25. maí 14:00

Veðurútlit með tilliti til snjóflóða

Næstu daga er spáð úrkomu með suðlægum áttum og sveiflum í hitastigi. Snjókoma verður til fjalla á mörgum stöðum.
Skrifað af vakthafandi sérfræðingi 16. maí 16:33


Snjóflóðahættutafla

Snjóflóðaspá er unnin eftir alþjóðlegri töflu.
Nánar


Um spárnar

Snjóflóðaspá er gerð mánudaga, miðvikudaga og föstudaga kl. 16 og uppfærð oftar ef þurfa þykir.

Spáin gildir fyrir stór landsvæði, ekki einstök gil, og er einkum gerð með ferðafólk í fjalllendi í huga. Spáin þarf ekki að vera lýsandi fyrir snjóflóðahættu í byggð.

Nánar





Aðrir tengdir vefir



Þetta vefsvæði byggir á Eplica