Desember 2002

Trausti Jónsson

Desember var einn hinn hlýjasti sem vitað er um hérlendis frá því að samfelldar mælingar hófust um 1820 og voru hlýindin voru sérstaklega mikil um sunnanvert landið. Í Reykjavík var álíka hlýtt í desember 1933 og nú, flutningar stöðvarinnar skapa ákveðna óvissu þannig að munur mánaðanna er vart marktækur. Meðalhiti í Reykjavík var 4,5°C, á Akureyri var hann 2,4°C og er þetta þriðji hlýjasti desember sem vitað er um á Akureyri, ívið hlýrra var 1953 og talsvert hlýrra 1933. Meðalhiti í Akurnesi var 3,6°C og -0,6°C á Hveravöllum, en þar hefur desember aldrei orðið jafnhlýr og nú. Mjög hlýtt var einstaka daga og komst hæst í 12,0°C í Reykjavík, jafnhátt og mest hefur orðið áður í desember (en það var reyndar fyrir aðeins ári).

Úrkomusamt var um landið sunnanvert, en þurrt fyrir norðan. Úrkoma mældist 119mm í Reykjavík og er það 50% umfram meðallag. Á Akureyri mældust aðeins 16mm og er það tæplega þriðjungur meðalúrkomu og er mánuðurinn einn af fimm þurrustu desembermánuðum frá því að mælingar hófust 1928. Í Akurnesi mældist úrkoman 231mm, en 65 á Hveravöllum.

Sólskinsstundir í Reykjavík mældust 7,6 og er það 5 stundum undir meðaltali. Á Akureyri mældist sólskin í aðeins 20 mínútur, eins og algengt er í desember, sjö sólskinsstundir mældust á Hveravöllum.

 Aldrei varð alhvítt í Reykjavík í desember. Það hefur tvisvar gerst áður í desember, 1952 og 1987, en mælingar hófust 1921. Jörð var flekkótt tvo morgna nú, en alautt var allan mánuðinn 1952 en sá mánuður var fádæma þurrviðrasamur. Aldrei varð heldur alhvítt á Akureyri í desember nú. Þó snjóhuluathuganir hafi verið misáreiðanlegar á Akureyri á árum áður verður að teljast líklegt að snjóleysið norðanlands nú sé einsdæmi. Snjóhula í fjöllum var heldur minni á Akureyri í desember 1997 en nú og var einnig svipuð fyrir ári. Þrátt fyrir snjóleysi var talsvert um hálkuóhöpp og slys á vegum.



Til baka, Senda grein, Prenta greinina

 




Aðrir tengdir vefir



Þetta vefsvæði byggir á Eplica