jarðskjálftayfirlit – október 2026

• Tæplega 1900 jarðskjálftar mældust á landinu í október, færri en í nokkrum öðrum mánuði ársins frá febrúar.

• Stærsti skjálfti mánaðarins mældist 5,2 að stærð í Bárðarbungu þann 19. október kl. 14:44, en annar skjálfti, 4,7 að stærð, mældist í Bárðarbungu þann 5. október.

• Alls mældust átta skjálftar 3 að stærð eða stærri á skilgreindum svæðum: þrír í Vatnajökli, þrír á Tjörnesbrotabeltinu og einn á hvorum stað á Reykjanesskaga og á Reykjaneshrygg. Þrír til viðbótar mældust langt utan við landið.

• Tvær afmarkaðar hrinur urðu í mánuðinum: á Tjörnesbrotabeltinu vestnorðvestur af Grímsey 4. október og á Reykjaneshrygg 8.–9. október.

• Á Reykjanesskaga mældust um helmingi færri skjálftar en að meðaltali á árinu, en í Öskju mældust fleiri skjálftar en í nokkrum öðrum mánuði frá febrúar.

Í heild mældust 1855 jarðskjálftar á landinu í október, en að meðaltali hafa mælst um 2650 skjálftar á mánuði frá febrúar. Munar þar mestu um minni virkni á Reykjanesskaga, auk þess sem færri skjálftar mældust á Tjörnesbrotabeltinu, í Langjökli og í Torfajökli en í september. Helsti atburður mánaðarins var skjálftinn í Bárðarbungu 19. október, sem var 5,2 að stærð. Þetta er þriðji skjálftinn yfir 5 að stærð í Bárðarbungu á árinu, en hinir urðu 31. janúar og 28. júlí. Engar tilkynningar bárust um að skjálftinn hafi fundist í byggð. Virkni í Bárðarbungu var í heild um tvöfalt meiri en í september og á Norðurgosbeltinu mældust fleiri skjálftar en í nokkrum mánuði síðan í maí.

Nánar má skoða yfirfarna skjálfta á Skjálfta-Lísu Veðurstofunnar

Reykjanesskagi

Tæplega 280 jarðskjálftar mældust á Reykjanesskaga í október, um helmingi færri en að meðaltali frá febrúar (um 560 á mánuði) og færri en í nokkrum öðrum mánuði á því tímabili. Flestir, um 215, voru á svæðinu við Kleifarvatn, en tæplega 60 á vestanverðum skaganum. Stærsti skjálftinn á skaganum mældist 3,4 að stærð 4. október, um 8 km austnorðaustur af Kleifarvatni, en sama dag mældist þar einnig skjálfti 2,3 að stærð. Á vestanverðum skaganum mældist stærsti skjálftinn 2,5 að stærð 14. október, um 11 km austnorðaustur af Reykjanestá. Engin afmörkuð hrina varð á skaganum og mældust mest 22 skjálftar á einum degi, þann 26. október.

Reykjaneshryggur

Rúmlega 260 jarðskjálftar mældust á Reykjaneshrygg í október, færri en í september (um 315) og undir meðaltali ársins frá febrúar (tæplega 380). Meginhluti virkninnar var í hrinu sem hófst síðdegis 8. október, um 18 km vestur af Eldey. Fyrsti skjálfti hrinunnar mældist kl. 16:37 og flestir skjálftarnir mældust um kvöldið, en virknin fjaraði út fram að hádegi 9. október. Alls mældust rúmlega 150 skjálftar í hrinunni, þar af 26 yfir 2 að stærð. Stærsti skjálftinn mældist 3,4 að stærð kl. 17:50 þann 8. október og var hann jafnframt stærsti skjálftinn á hryggnum í mánuðinum.

Um 60 skjálftar mældust yfir mánuðinn rétt vestur af Reykjanestá, sá stærsti 1,9 að stærð þann 23. október. Lengra úti á hryggnum mældust stakir skjálftar, sá stærsti 2,9 að stærð 7. október, um 68 km vestsuðvestur af Reykjanestá.

Hengill

Tæplega 90 jarðskjálftar mældust á Hengilssvæðinu í október, svipað og í ágúst og september. Virknin dreifðist yfir mánuðinn og mældust flestir skjálftar 2. október, 13 talsins. Stærsti skjálftinn mældist 2,4 að stærð 11. október, um 13 km norðvestur af Hveragerði, og skjálfti 2,2 að stærð mældist 21. október. Að kvöldi 15. október mældust 21 smáskjálftar á rúmum tveimur klukkustundum um 17 km norðvestur af Hveragerði, á 13–17 km dýpi.

Suðurland

Um 270 jarðskjálftar mældust á Suðurlandi í október, færri en í september þegar rúmlega 350 mældust, einkum vegna minni virkni í Torfajökli.

Suðurlandsbrotabeltið

Rúmlega 90 jarðskjálftar mældust á Suðurlandsbrotabeltinu, dreift yfir mánuðinn án afmarkaðrar hrinu. Það er svipað og í ágúst og september. Allir voru smáskjálftar og mældist sá stærsti 1,9 að stærð í Árnessýslu 4. október kl. 10:13.

Hekla

Tíu jarðskjálftar mældust í og við Heklu í október, svipað og undanfarna mánuði. Allir voru smáskjálftar og mældist sá stærsti 1,6 að stærð 16. október.

Katla

100 jarðskjálftar mældust í Mýrdalsjökli í október, talsvert fleiri en í september (56) og ágúst (77), en nokkru undir meðaltali ársins (um 125 á mánuði). Að kvöldi 3. október mældust sjö skjálftar á einni klukkustund, þar á meðal stærsti skjálftinn á svæðinu, 2,9 að stærð kl. 21:27. Flestir skjálftar mældust 9. október, 19 talsins, dreift yfir daginn og allir undir 2 að stærð. Skjálfti 2,8 að stærð mældist 10. október.

Torfajökull

Rúmlega 60 jarðskjálftar mældust í og við Torfajökul í október, mun færri en í september þegar um 170 mældust, en svipað og að meðaltali á árinu. Flestir voru staðsettir um 9 km vestsuðvestur af Landmannalaugum. Snemma morguns 27. október mældust tíu skjálftar á tveimur klukkustundum, sá stærsti 2,2 að stærð og var hann jafnframt stærsti skjálftinn á svæðinu í mánuðinum.

Eyjafjallajökull

Tveir smáskjálftar mældust við Eyjafjallajökul í október, 3. og 24. október, báðir undir 1 að stærð.

Vesturland

Grjótárvatn

142 jarðskjálftar mældust á svæðinu við Grjótárvatn í október, talsvert fleiri en í september þegar 92 mældust, og svipað og að meðaltali á árinu. Flestir mældust 15. október, 25 talsins, þar af 20 á milli kl. 17 og 19. Allir skjálftar mánaðarins voru smáskjálftar og mældist sá stærsti 1,6 að stærð 5. október kl. 14:40. Flestir skjálftanna voru á 16–21 km dýpi.

Langjökull

50 jarðskjálftar mældust í og við Langjökul í október, um þrisvar sinnum færri en í september þegar rúmlega 160 mældust. Virknin dreifðist yfir mánuðinn án afmarkaðrar hrinu. Stærsti skjálftinn mældist 2,8 að stærð 1. október, og þrír aðrir mældust yfir 2 að stærð, þann 1., 11. og 19. október. Auk þess mældust 14 smáskjálftar dagana 22.–28. október á afmörkuðum stað um 10 km norður af Geysi, utan Langjökulssvæðisins í svæðaskránni (sjá Önnur svæði).

Vatnajökull

Bárðarbunga

137 jarðskjálftar mældust í Bárðarbungu í október, um tvöfalt fleiri en í september og fleiri en í nokkrum mánuði síðan í júní. Stærsti skjálfti mánaðarins á landinu, 5,2 að stærð, varð í Bárðarbungu 19. október kl. 14:44. Frá því um kl. 11 sama dag höfðu nokkrir skjálftar mælst á svæðinu, þar af tveir um 2,7 og 3,0 að stærð, og alls mældust 25 skjálftar í Bárðarbungu þann dag. Á sólarhringnum eftir stóra skjálftann mældust 17 skjálftar, sá stærsti 2,0 að stærð. Þetta er þriðji skjálftinn yfir 5 að stærð í Bárðarbungu á árinu, en hinir urðu 31. janúar og 28. júlí. Þann 5. október kl. 17:28 mældist skjálfti 4,7 að stærð í Bárðarbungu. Á sólarhringnum á eftir mældust 27 skjálftar, sá stærsti 2,0 að stærð.

Grímsvötn

Níu jarðskjálftar mældust í Grímsvötnum í október, færri en í nokkrum öðrum mánuði frá febrúar. Allir voru smáskjálftar og mældist sá stærsti 1,4 að stærð 13. október.

Öræfajökull

Tíu jarðskjálftar mældust við Öræfajökul í október, allir undir 1 að stærð. Það er svipað og undanfarna mánuði.

Fyrir utan þessi þrjú svæði mældust 120 jarðskjálftar annars staðar í og við Vatnajökul, fleiri en í ágúst og september. Þar af mældust um 33 á djúpa svæðinu við Bárðarbungu og 19 við Kverkfjöll. Skjálfti 3,1 að stærð mældist 4. október kl. 12:16 um 18 km suðsuðvestur af Bárðarbungu, ekki svo langt frá Hamrinum.

Hofsjökull

Einn jarðskjálfti, 1,7 að stærð, mældist í Hofsjökli 2. október, eins og í september.

Norðurgosbeltið

Tæplega 290 jarðskjálftar mældust á Norðurgosbeltinu í heild í október, fleiri en í september (rúmlega 200) og fleiri en í nokkrum mánuði síðan í maí. Þar af mældust um 100 við Herðubreið og um 70 á Kröflusvæðinu, þar sem allir skjálftarnir voru undir 1,5 að stærð. Þann 31. október mældust 27 skjálftar við Herðubreið, flestir á milli kl. 06 og 10, og var sá stærsti 2,0 að stærð. Stærsti skjálftinn á Norðurgosbeltinu utan Öskju mældist 2,3 að stærð 3. október við Bæjarfell norður af Mývatni.

Askja

74 jarðskjálftar mældust í og við Öskju í október, fleiri en í nokkrum öðrum mánuði frá febrúar. Til samanburðar mældust þar um 50 skjálftar í september. Virknin dreifðist yfir mánuðinn og mældust flestir 24. október, tíu talsins. Stærsti skjálftinn mældist 2,2 að stærð 23. október.

Tjörnesbrotabeltið

Tæplega 140 jarðskjálftar mældust á Tjörnesbrotabeltinu í október, talsvert færri en í september þegar um 340 mældust. Mesta virknin var um 35 km vestnorðvestur af Grímsey, á svipuðum slóðum og skjálftar mældust 28.–30. september. Þar mældust um 50 skjálftar í mánuðinum, þar af 36 í hrinu þann 4. október, sem stóð frá því skömmu eftir miðnætti og fram á kvöld. Í hrinunni mældust tveir skjálftar yfir 3 að stærð, 3,2 að stærð kl. 08:43 og 3,8 að stærð kl. 13:13, sem var stærsti skjálftinn á svæðinu í mánuðinum. Á sömu slóðum mældist einnig skjálfti 3,3 að stærð 1. október. Í Axarfirði mældust tæplega 30 smáskjálftar.

Önnur svæði

Skjálfti 2,2 að stærð mældist 7. október kl. 23:44 um 4 km vestur af Heimaey í Vestmannaeyjum, á um 16 km dýpi. Einn smáskjálfti mældist í Borgarfirði 5. október en einnig mældist stakur skjálfti 1,4 að stærð á Auðkúluheiði 10. október

Dagana 22.–28. október mældust 14 smáskjálftar á afmörkuðum stað um 10 km norður af Geysi, á 4–9 km dýpi, sá stærsti 1,3 að stærð. Á þessum stað hafði áður mælst um einn skjálfti á mánuði á árinu. Tveir smáskjálftar mældust einnig um 10 km vestnorðvestur af Geysi 4. október.