• Athugið

    Búast má við áftamhaldandi vatnavöxtum á Snæfellsnesi og sunnanverðum Vestfjörðum. Leysing um helgina á norðan- og austanverðu landinu. Meira
Fréttir
Sólarupprás í Reykjavík kl. 10:44 hinn 12. desember 2014.

Tíðarfar í desember 2014

Stutt yfirlit

5.1.2015

Mánuðurinn var kaldur suðvestanlands en hiti var yfir meðallagi áranna 1961 til 1990 í öðrum landshlutum, en undir meðallagi síðustu tíu ára um land allt. Nokkuð umhleypinga- og illviðrasamt var í veðri og úrkoma víðast yfir meðallagi. Snjór var meiri en að jafnaði í desember.

Landsmeðalhiti í byggð var undir frostmarki lengst af en síðustu dagar ársins voru hlýir. Norðlægar áttir voru algengari heldur en suðlægar í mánuðinum.

Hiti

Mánaðarmeðalhitinn í Reykjavík var -0,7°C sem er -0,5 gráðum kaldara en meðaltal áranna 1961-1990 og -1,4 gráðum kaldara en meðaltal síðustu 10 ára. Á Akureyri var mánaðarmeðalhitinn -1,4 stig, sem er 0,5 stigum yfir meðalhitanum 1961-1990 en -0,7 stigum undir meðalhita í desember síðustu 10 árin.

Meðalhita og vik á fleiri stöðvum má sjá í töflu.

stöð meðalhiti °C vik 1961-1990 röð af vik 2004 til 2013
Reykjavík -0,7 -0,5 94 til 95 144 -1,4
Stykkishólmur -0,4 0,4 83 169 -0,8
Bolungarvík -0,5 0,4 58 117 -0,6
Grímsey 0,4 1,3 42 140 -0,4
Akureyri -1,4 0,5 69 133 -0,7
Egilsstaðir -1,5 0,7 28 60 -0,2
Dalatangi 1,4 0,8 36 76 -0,5
Teigarhorn 0,4 0,5 72 142 -0,6
Höfn í Hornaf. 0,7 0,3 0,0
Stórhöfði 0,9 -0,6 93 138 -1,1
Hveravellir  vantar
Árnes -3,1 -1,4 108 134 -2,3

Að tiltölu var langkaldast í uppsveitum á Suðurlandi, en hlýjast norðaustan- og austanlands.

Meðalhiti mánaðarins var hæstur í Surtsey, 2,2 stig, en lægstur í Sandbúðum, -7,7 stig. Lægstur var meðalhitinn í byggð í Svartárkoti og í Möðrudal, -4,6 stig.

Hæsti hiti mánaðarins mældist 16,0 á Skjaldþingsstöðum þann 29. Hæsti hiti á mannaðri stöð mældist á sama stað og sama dag, 15,2 °C. Lægsti hiti á landinu mældist -20,7 stig á Brúarjökli þann 12. Lægsti hiti í byggð mældist -19,8 stig í Möðrudal þann 24. og 25. Lægsti hiti á mannaðri veðurstöð mældist -17,7 stig á Grímsstöðum á Fjöllum þann 12. og 13.

Hámarkshitinn á Skjaldþingsstöðum þ. 29. er nýtt landsdægurmet og raunar hæsti hiti sem mælst hefur á landinu milli jóla og nýárs. Aflesturinn á kvikasilfursmælinn á Skjaldþingsstöðum morguninn eftir, 14,5 stig, er einnig nýtt dægurmet fyrir þann dag, þann 30.

Úrkoma

Úrkomusamt var um mestallt land. Að tiltölu var úrkoman einna mest um miðbik Norðurlands.

Úrkoma í Reykjavík mældist 110,0 mm og er það um 40 prósent umfram meðallag. Í Stykkishólmi mældist úrkoman 129,6 mm og er það um 80 prósent umfram meðallagið. Á Akureyri mældist úrkoman 158,1 mm og er það um þreföld meðalúrkoma í desember, jafnmikil eða meiri úrkoma hefur ekki mælst á Akureyri í desember síðan samfelldar mælingar hófust þar 1928. Á Höfn í Hornafirði mældist úrkoman 201,7 mm.

Dagar þegar úrkoma mældist 1,0 mm eða meiri voru 17 í Reykjavík og er það 3 fleiri en í meðalári, á Akureyri voru slíkir dagar 19, 8 fleiri en að meðallagi.

Sólskinsstundafjöldi

Sólskinsstundir í Reykjavík mældust 9,3 og er það 3 klst. minna en í meðalári. Á Akureyri mældist ekkert sólskin í mánuðinum eins og algengast er í desember.

Snjólag

Alhvítir dagar í Reykjavík voru 25. Að meðaltali 1971 til 2000 var alhvítt 13 daga í desember. Árið 2011 voru 29 alhvítir dagar í desember, og árið 1936 (þegar reyndar var snjólétt) voru þeir jafnmargir og nú. Annars hafa alhvítir dagar alltaf verið færri í mánuðinum. Alhvítt var 28 daga á Akureyri, það er 6 dögum meira en í meðaldesember.

Samgöngur riðluðust nokkuð í hríðarveðrum í mánuðinum, m.a. í þéttbýli á höfuðborgarsvæðinu þann 16. Í hlákunni milli jóla og nýárs var víða mjög hált.

Óveður
""
Eins og kemur fram í  texta var nokkuð illviðrasamt á landinu í desember.  Á höfuðborgarsvæðinu var veðrið einna verst þann 16. Myndin er tekin kl. 13:39  í hringtorgi á Vatnsendavegi í Kópavogi, rétt við verslun Krónunnar í Vallakór. Ljósmynd: Hreinn Eggertsson.

Vindhraði og loftþrýstingur

Vindátt var mjög á reiki, norðlægar áttir þó meira ríkjandi en suðlægar. Vindhraði var um 0,8 m/s yfir meðallagi á landinu í heild.

Nokkuð illviðrasamt var í mánuðinum, mest kvað að veðrunum þ. 1. (af suðvestri), 9. til 11. (af suðaustri en síðan norðri) og 14. (einnig af norðri).

Meðalloftþrýstingur í Reykjavík mældist 993,7 hPa og er það -7,2 hPa undir meðallagi áranna 1961 til 1990. Lægstur mældist þrýstingurinn á Gufuskálum þann 9., 948,1 hPa en hæstur 1031,4 hPa í Bolungarvík og Önundarhorni þann 27.

Skjöl fyrir desember

Meðalhiti á sjálfvirkum veðurstöðvum í desember 2014 (textaskjal).

Þessa grein er einnig hægt að lesa sem pdf-skjal, Tíðarfar í desember 2014 (0,4 Mb)



Aðrir tengdir vefir



Þetta vefsvæði byggir á Eplica