Hátt í 1600 hundruð jarðskjálftar voru staðsettir í mánuðinum. Skjálftahrina með tæplega 800 skjálftum varð við Geirfuglasker á Reykjaneshrygg fyrri hluta mánaðarins og voru stærstu skjálftarnir yfir fjórum stigum og fundust víða á suðvestan- og sunnanverðu landinu.

Tíðarfar í maí var nærri meðallagi á landinu að slepptum fyrstu dögunum sem voru óvenjukaldir. Snjó leysti venju fremur seint um landið norðaustanvert. Hlýjast var að tiltölu á Austfjörðum. Úrkoma var yfir meðallagi á landinu.

Veðurstofan hvetur notendur vefsins til þess að láta aðra vita af efni sem þeim þykir áhugavert. Veðurstofan minnir einnig á RSS þjónustuna á vedur.is. Áhugasamir geta gerst áskrifendur að fróðleiksgreinum og fréttum. Hægt er að velja úr málaflokkum sem endurspegla viðfangsefni Veðurstofunnar.

Tíðarfar í maí var nærri meðallagi á landinu að slepptum fyrstu dögunum sem voru óvenjukaldir. Snjó leysti venju fremur seint um landið norðaustanvert.

Út er komið Jöklakort af Íslandi þar sem settar eru saman á eitt kort útlínur allra jökla á landinu.

Tæplega 2500 jarðskjálftar hafa verið staðsettir. Helsti atburður mánaðarins var snörp skjálftaröð vestan við Grímsey, sem hófst með jarðskjálfta af stærð 5,5 þann 2. apríl. Skjálftinn fannst víða á Norðurlandi. Nokkur þúsund eftirskjálftar mældust, og er úrvinnslu ekki lokið.

Aprílmánuður var kaldur á landinu. Kaldast var inn til landsins á norðaustan- og austanverðu landinu. Snjór var til ama víða norðan- og austanlands og norðantil á Vestfjörðum. Úrkoma var víðast hvar innan við meðallag. Sólskinsstundir voru óvenjumargar suðvestanlands.

Veturinn 2012 til 2013 var hlýr um landið sunnan- og vestanvert. Sérlega hlýtt var um miðbik hans, en þá náðu hlýindin um nær allt land. Kaldara var til beggja handa og um landið norðan- og austanvert. Snjór kom snemma í byggðir þar um slóðir og fer seint og telja menn tíðarfar hafa verið erfitt. Syðra var veður mjög hagstætt lengst af.

Rúmlega 1000 jarðskjálftar mældust með SIL-mælakerfi Veðurstofu Íslands í mars. Stærsti skjálftinn var 3,8 stig með upptök í Eyjafjarðarál. Hann fannst á Siglufirði, Ólafsfirði, Dalvík og Húsavík.

Opinn ársfundur Veðurstofu Íslands var haldinn að Bústaðavegi 7 hinn 4. apríl. Dagskráin hófst með ávarpi ráðherra og kynningu forstjóra. Þrjú erindi voru flutt: Um rannsóknainnviði Veðurstofunnar, um snjó og samgöngur á norðurslóðum og um rannsóknir á vindauðlindinni. Fundurinn var vel sóttur.

Tíðarfar telst fremur hagstætt að undanskildum nokkrum dögum snemma í mánuðinum; þá gerði talsverða frosthörku og slæm hríð gekk yfir meginhluta landsins. Síðari hluti mánaðarins var hagstæður, vindur lengst af hægur og úrkoma lítil. Loftþrýstingur var með hæsta móti í mánuðinum. Norðurljós sáust einkar vel á SV-landi um miðjan mánuðinn.

Skjálftavirknin í Skjálfandadjúpi hefur færst bæði til norðvesturs og suðausturs af meginskjálftanum sem var af stærð 5,5 um eittleytið aðfaranótt 2. apríl. Tveir allsnarpir skjálftar fundust á Norðurlandi í gærkvöldi. Í nótt hafa margir skjálftar mælst milli 3 og 4 að stærð. Áfram má búast við skjálftum af svipaðri stærð á svæðinu.

Meginskjálftinn varð á norðlægu vinstrihandar sniðgengi. Það þýðir að vinstri brún misgengisins fer til suðurs en sú hægri til norðurs. Næststærsti skjálftinn, sem varð um kl. 9, er um 7,5 km norðvestan við meginskjálftann og er á siggengi, sem bendir til spennu-breytinga í nágrenni stóra skjálftans.

Snarpur jarðskjálfti, af stærð 5,5, varð kl. 00:59 þann 2. apríl með upptök í Skjálfandadjúpi eða um 15 km austur af Grímsey. Upptökin eru á brotabelti sem liggur frá Öxarfirði og norður fyrir Grímsey. Skjálftahrinur eru mjög algengar á þessu svæði. Vel verður fylgst með virkninni áfram.

Gasmælingastöð á tindi Heklu hefur verið endurhönnuð af tæknimönnum Veðurstofunnar og ítölsku jarðváreftirlits-stofnunarinnar INGV svo að hægt sé að mæla þar allan ársins hring. Búnaðurinn og rafgeymar eru í sérsmíðuðum kofa og sólarljós og hiti úr eldfjallinu nýtt til að halda stöðinni gangandi. Verkefnið hófst snemma árs 2012 í samstarfi Veðurstofunnar, ÍSOR og INGV.

Stofnskrá Alþjóðaveðurfræði-stofnunarinnar gekk í gildi 23. mars 1950. Er þess minnst árlega á alþjóðlega veðurdeginum, fyrst 1960. Kjörorð dagsins í ár er „Watching the weather to protect life and property“ eða Vöktum veðrið til verndar lífi og eigum.

Flóð féll úr Skollahvilft við Flateyri að morgni 20. mars skammt austan eyrarinnar, um 30-40 m breitt en fremur þunnt. Flóðið féll kl. 04:44 og annað kl. 07:20 en ummerki um það sjást ekki úr byggð. Telja má líklegt að fyrra snjóflóðið hafi fallið á varnargarðinn og runnið meðfram honum. Síðan varnargarðarnir ofan Flateyrar voru reistir 1998 hafa lent á þeim 6 snjóflóð sem garðarnir beindu frá byggðinni án þess að tjón hlytist af.

Vorráðstefna Jarðfræðafélags Íslands verður haldin í Öskju, Náttúrufræðahúsi Háskóla Íslands, föstudaginn 22. mars 2013. Meðal annars verður fjallað um samfelldar GPS mælingar á Íslandi og gefið yfirlit um jarðskjálfta á Íslandi árið 2012.

Kristín S. Vogfjörð, rannsóknastjóri Veðurstofu Íslands, kynnir samevrópskt net jarðvísindalegra innviða sem nefnist EPOS, European Plate Observing System.

Veðurstofan hefur með tilstyrk Ofanflóðasjóðs þróað kortasjá með það að markmiði að auðvelda aðgengi að ofanflóðagögnum. Kortasjánni fylgja leiðbeiningar á formi notendahandbókar. Ábendingar um það hvað vantar eða hvað mætti betur fara eru vel þegnar.

Rúmlega 800 jarðskjálftar mældust með SIL-mælakerfi Veðurstofu Íslands í febrúar. Allir voru innan við þrjá að stærð.

7.3.2013 Óveðrið hinn 6. mars var óvenjulegt fyrir þær sakir að snjókoma og hvasst var í öllum landshlutum á sama tíma. Samgöngur röskuðust mjög, einkum á höfuðborgarsvæðinu. Daginn eftir var veður rysjótt víðast hvar. Áfram var búist við slæmu ferðaveðri vegna slyddu, snjókomu og skafrennings og fólk hvatt til að fylgjast vel með veðurspá.

6.3.2013 Eins og landsmenn vita, þá er  austanvonskuveður á öllu landinu, stormur og blindbylur, jafnvel rok allra syðst. Búist við að veður fari smám saman að ganga niður síðdegis og dragi þá jafnframt úr ofankomu og skafrenningi. Ekki dregur úr veðurhæð syðst á landinu fyrr en í nótt. Á höfuðborgarsvæðinu dregur fljótlega úr ofankomu en áfram verður hvasst og skafrenningur til fyrramáls.

Mánuðurinn var sérlega hlýr, annar til fjórði hlýjasti febrúar frá upphafi mælinga á 19. öld. Úrkomusamt var um landið sunnanvert og var mánuðurinn sums staðar sá úrkomusamasti frá upphafi mælinga. Samgöngur voru lengst af greiðar en vegir spilltust af þíðu. Talsverð flóð gerði í ám sunnanlands undir lok mánaðarins.

Rennsli á efra vatnasviði Hvítár (við Fremstaver) lækkar hratt. Klukkan tvö, miðvikudaginn 27. febrúar, var rennsli við Fremstaver um 264 rúmmetrar á sekúndu, um 50 prósent minna en daginn áður. Aðrir mælar á vatnasviði Hvítár og Ölfusár sýna að vatnshæð fer ört lækkandi. Þrátt fyrir að ekki sé spáð mikilli úrkomu á svæðinu næstu daga mun það taka flóðið einn til tvo daga að sjatna.

Klukkan eitt, þriðjudaginn 26. febrúar, var rennsli Hvítár við Fremstaver yfir 520 rúmmetrar á sekúndu en það fór hæst í rúmlega 600 rúmmetra á sekúndu daginn áður. Það tekur vatnið um sólarhring að renna frá Fremstaveri niður í Ölfusá við Selfoss. Því var gert ráð fyrir að hámarksrennsli í Ölfusá yrði náð seinna sama dag eða um kvöldið og þá viðbúið að það héldist hátt vel fram á miðvikudaginn. Spáð var rigningu fram á þriðjudagskvöld en kaldara og þurrara veðri er liði á vikuna þannig að búast má við að vatnavextir minnki á næstu dögum.

Vatnavextir eru á Vesturlandi, Suðurlandi og Suðausturlandi vegna mikilla rigninga og hlýinda undanfarna daga. Flóð mun koma fram í Auðholtshverfi, vestan við Flúðir, síðan á Skeiðum og svo á Dagmálahólma, norðan Selfoss. Einnig má búast við flóði við Kaldaðarnes, sunnan Selfoss. Bændum er ráðlagt að koma búfénaði úr hættu. Jafnframt er flóðahætta á Suðurlandi og Suðausturlandi í Hverfisfljóti og Djúpá. Ferðafólki og öðrum er ráðlagt að halda sig fjarri ánum. Frekari upplýsingar munu berast ef aðstæður breytast.

Landsvirkjun hefur gangsett tvær vindmyllur norðan við Búrfell, á hraunsléttu sem kölluð er Hafið. Þrátt fyrir nafnið, er Hafið sjötíu kílómetra frá sjó en þar hafa verið reistar tvær vindmyllur í rannsóknarskyni. Þetta eru langstærstu vindmyllur sem reistar hafa verið á Íslandi. Í fyrsta sinn verður hagkvæmni raforkuframleiðslu með vindorku könnuð á Íslandi.

Rúmlega 700 jarðskjálftar mældust með SIL-mælakerfi Veðurstofu Íslands í  mánuðinum. Það er nokkuð minni virkni en undanfarna mánuði og þarf að fara aftur til mars 2012 til að finna svipaðan fjölda skjálfta. Mesta virknin var úti fyrir Norðurlandi og nokkrar smáhrinur mældust bæði norðanlands og sunnan. Stærsti skjálftinn var 3,2 og varð hann 29. janúar um sjö kílómetrum vestan Flateyjar á Skjálfanda.

Þorraþing Veðurfræðifélagsins verður haldið 12. febrúar 2013 í húsnæði Veðurstofunnar að Bústaðavegi 7. Þingið hefst kl. 13:30. Erindin eru fimm að þessu sinni og í framhaldi af þinginu heldur félagið aðalfund sinn. Veðurfræðifélagið og þing þess eru opin öllum sem hafa áhuga á veðri og veðurfari.

Mjög hlýtt var í janúar og var hann í hópi þeirra tíu hlýjustu sem mælst hafa á flestum veðurstöðvum landsins. Úrkomusamt var um meginhluta landsins nema á sumum stöðvum norðvestan- og norðanlands. Tíð var lengst af hagstæð en nokkurra daga hríðar- og krapaveður gekk yfir hluta Vestfjarða, Norður- og Austurlands seint í mánuðinum. Fokskaðar urðu þá á stöku stað.

Óvissustig felur ekki í sér yfirvofandi snjóflóðahættu í byggð en óvissustigi er lýst yfir til þess að þeir sem koma að aðgerðum, sem getur þurft að grípa til, séu viðbúnir. Óvissustigi er lýst yfir fyrir heila landshluta en ekki tiltekna staði. Oftast er einungis um að ræða hugsanlega snjóflóðahættu á einum eða fáum stöðum á viðkomandi svæði. Árétta þarf, að umtalsverð snjóflóðahætta samkvæmt svæðisspá fyrir stóran landshluta þarf ekki að fela í sér hættu á snjóflóðum í byggð á viðkomandi svæði.

22.1.2013 Breytingar verða gerðar á vef Veðurstofu Íslands í dag. Breytingarnar ná til veðurþátta- og staðaspáa, auk þess sem snjóflóðaspár verða birtar fyrir valin svæði. Búast má við tímabundnum hnökrum á meðan uppfærslan stendur yfir. Beðist er velvirðingar á þessu.

Rúmlega 1000 jarðskjálftar voru staðsettir með SIL-mælakerfi Veðurstofunnar í desember, nokkru minni virkni en næstu þrjá mánuði á undan en svipuð og í ágúst. Dregið hefur úr skjálftahrinunni í Eyjafjarðarál sem hefur verið viðvarandi frá 21. október. Tveir skjálftar náðu stærðinni 3,3, annar við Kistufell í Vatnajökli og hinn á Reykjaneshrygg.

Snjóflóðahrinan sem valdið hefur vandræðum á Vestfjörðum og Norðurlandi undanfarna daga er líklega versta hrina sem orðið hefur á Vestfjörðum síðan 2005. Mörg snjóflóð féllu yfir vegi og nokkur nærri byggð á norðanverðum Vestfjörðum. Snjóflóðahrinan olli einnig miklum truflunum á samgöngum á Norðurlandi þó ekki kæmi þar til rýmingar á húsum. Hlýnandi veður í lok hrinunnar olli svo hættu á snjóflóðum í meira en sólarhring eftir að veðrið gekk niður.

Veður í desember var fremur hagstætt framan af en óhagstætt undir lokin. Síðustu dagar ársins voru snjóa- og illviðrasamir, einkum um norðan- og norðvestanvert landið. Hiti var vel ofan meðallags í flestum landshlutum, en þó aðeins í rétt rúmu meðallagi inn til landsins á Austurlandi.

Tíð var lengst af hagstæð. Þó komu slæmir illviðrakaflar í fyrstu tveimur mánuðum ársins og auk þess í september og framan af nóvember. Árið var sérlega sólríkt, en þurrkar háðu jarðargróðri langt fram eftir sumri um landið norðan- og norðvestanvert. Mjög hlýtt var í veðri lengst af.

Viðvörun 29. desember 2012 Veðurstofan varar við óveðri á Vestfjörðum og norðan- og vestanlands. Ekkert ferðaveður er á þessum svæðum. Á höfuðborgarsvæðinu er spáð norðaustan 15-23 m/s um og eftir hádegi, hvassast á Kjalarnesi. Líkur á stöku éljum og hiti um frostmark. Víða hefur snjóað í fjalllendi undanfarna daga og snjóflóðahætta getur skapast á skömmum tíma þegar hvessir. Stórstreymt er þessa dagana samfara óvenju lágum loftþrýstingi, mikilli veðurhæð, ölduhæð og áhlaðanda.

Veðurstofan varar við óveðri á Vestfjörðum á föstudagskvöld og á laugardag um allt land, sérstaklega norðantil. Ekkert ferðaveður verður á norðanverðu landinu.

Starfsmenn Veðurstofunnar óska öllum landsmönnum gleðilegra jóla og þakka samstarf og velvilja á árinu sem er að líða.

Við birtum veðurspána fyrir hátíðarnar hér fyrir neðan í dag og næstu daga. Smellið á tengilinn.

Á einföldum Íslandskortum er hægt að sjá hvernig veðrið var um jólin allt frá árinu 1949.

Tæplega 1500 jarðskjálftar mældust í nóvember með jarðskjálftamælakerfi Veðurstofunnar. Mesta virknin var í Eyjafjarðarál. Stærsti skjálftinn þar var 3,7 að stærð. Lítið jökulhlaup varð úr Grímsvötnum.

Tíðarfar í mánuðinum var lengst af óhagstætt. Mikill snjór var víða um landið norðanvert en snjólétt syðra. Illviðri voru með meira móti, sérstaklega framan af, og fyrstu dagana gerði óvenjuöflugt norðanillviðri með foktjóni víða um land.

Í tilefni af loftslagsfundinum sem nú er haldinn i Doha í Qatar sendi Alþjóðaveðurfræðistofnunin frá sér fréttabréf um veðurfar það sem af er árinu 2012. Venjuleg heildarsamantekt verður að vanda gefin út í mars.

Rennslið í Gígjukvísl var mælt þegar það var í hámarki í gærkvöldi og svo aftur í dag. Af þessum breytingum í vatnshæð er dregin sú ályktun að hlaupið sé að fjara út en geti varað í nokkra daga.

Staðfest hefur verið með leiðnimælingu við brúna á Gígjukvísl að hlaupvatn er í ánni. Ekki er gert ráð fyrir að hlaupið verið stórt.

Ofarlega í Djúpagili rekur Vegagerðin snjódýptarmæli sem mikið reyndi á í snjóflóði um helgina. Veðurstofan og Vegagerðin reka níu slíka mæla víðsvegar um Ísland og fimmtán mælar eru reknir í Skandinavíu. Þeir hafa reynst áreiðanlegasta mælitæki sem völ er á til þess að mæla snjódýpt á upptaka-svæðum þar sem aðstæður eru erfiðar vegna hvassviðris, ísingar og örðugleika á því að framleiða nægt rafmagn til þess að reka nema og fjarskiptabúnað.

Rúmlega 2000 jarðskjálftar hafa verið staðsettir með SIL-mælakerfi Veðurstofu Íslands í október. Langflestir og stærstu skjálftar mánaðarins urðu í Eyjafjarðarál. Tveir voru yfir 5 að stærð og fleiri yfir 4 að stærð. Þeir fundust víða norðanlands.

Í andrúmsloftinu er ógrynni ýmis konar agna eða svifryks, sem myndast bæði af völdum náttúrunnar sjálfrar og af mannavöldum. Svifryk hefur neikvæð áhrif á heilsu manna, einnig svifryk af jarðefnauppruna. Rykmengun frá iðnaði og útblæstri bíla hefur gegnum árin fengið mikla athygli en minna hefur farið fyrir umræðu um ryk sem rekja má til uppblásturssvæða, landbúnaðar eða gosösku. Þverfaglegt málþing verður haldið föstudaginn 16. nóvember í Öskju við Háskóla Íslands.

WMO staðfesti nýlega skipulag og innleiðingaráætlun fyrir alþjóðaramma um veðurþjónustu, sem er stórt skref í þá átt að auka vægi veðurspáa og rannsókna á veðri víða um heim. Ástæðan er hröðun loftslagsbreytinga sem veldur öfgum í veðri og veðurfari. Fari svo fram sem horfir er aukin hætta á eyðileggjandi flóðum, alvarlegum þurrkum, hitabylgjum og mikilli úrkomu. Samkvæmt áætluninni verður í fyrstu lögð áhersla á bætta þjónustu er varðar viðvaranir, heilsu, vatnsvernd og -nýtingu, landbúnað og fæðuöryggi.

Veðurstofan vill minna á að stormur (vindhraði á bilinu 18-25 m/s) geisar á Vestfjörðum og á annesjum fyrir norðan. Mun veðrið færa sig inn á land norðan- og norðvestanlands eftir hádegi á föstudag og einnig suður um vestanvert landið seinnipart föstudags með hviðum sem geta náð yfir 40 m/s. Staðbundið má búast við talsvert mikilli ofankomu, einkum nyrst á Tröllaskaga. Stöku él verða fyrir sunnan. Vegfarendum er bent á að fylgjast náið með upplýsingum um færð og veður.

Veðurstofan varar við stormi um landið norðan- og vestanvert á morgun, föstudag. Vegfarendum er bent á að færð og skyggni getur versnað hratt og ekkert ferðaveður verður á norðvestanverðu landinu. Eins getur orðið varhugavert að vera á ferð við fjöll vestantil á landinu. Ferðaveður versnar einnig norðaustanlands á föstudagskvöld.

Ljósmyndin er úr vinnuferð yfir jökli. Mánuðurinn telst fremur hagstæður og hægviðrasamur. Lítill snjór var á láglendi. Hiti var nærri meðallagi um landið vestanvert, en annars lítillega undir því, mest rúmt eitt stig á Austurlandi.

Vatn í listum er viðfangsefni hádegisfyrirlestrar í Þjóðminjasafninu, miðvikudaginn 7. nóvember kl. 12:10. Þar mun Halldór Björn Runólfsson, safnstjóri Listasafns Íslands, fjalla um vatn í myndlist og Karólína Eiríksdóttir tónskáld fjalla um vatn í tónlist. Vatn hefur ekki eingöngu hagnýtt gildi fyrir manninn heldur hefur það verið listamönnum innblástur í gegnum tíðina. Þannig er vatn algengt viðfangsefni myndlistarmanna og heilu tónverkin hafa verið samin um vatn.

2.11.2012 Veðurstofan varar við norðan vonskuveðri á öllu landinu næsta sólarhring. Búast má við norðanstormi með vindhraða á bilinu 20-28 m/s um allt land og mjög hvössum vindhviðum, allt að 55 m/s, við fjöll, einkum á sunnanverðu landinu frá Snæfellsnesi til Austfjarða. Spáð er talsverðri ofankomu á N- og A-landi í dag

Veðurstofan varar við norðan vonskuveðri á öllu landinu næstu tvo sólarhringa. Búast má við norðanstormi með vindhraða á bilinu 20-28 m/s um allt land og mjög hvassar vindhviður, allt að 55 m/s, verða við fjöll, einkum á S-verðu landinu frá Snæfellsnesi til Austfjarða. Spáð er talsverðri ofankomu á N- og A-landi á föstudaginn.

Veðurstofan ítrekar vonskuveður um norðanvert landið næstu daga. Búast má við norðanátt og snjókomu með vindhraða á bilinu 13-20 m/s. Mjög slæmt ferðaveður og ekki búist við að veður fari að ganga niður fyrr en seint á laugardag og sunnudag. Ölduhæð getur náð 12 metrum norður og austur af landinu og samfara hárri sjávarstöðu gæti það valdið vandræðum á hafnarsvæðum, einkum fyrir norðan.

Veðurstofan vill vekja athygli á slæmu veðri sem spáð er næstu daga. Eftir hádegi 30. okt. verður komið norðan vonskuveður um landið norðanvert. Snjókoma og él geta spillt færð og skyggni á skömmum tíma. Þeir sem hafa húsdýr úti við ættu að huga að því að koma skepnum í skjól.

Sjálftavirknin við Eyjafjarðarál heldur áfram en lítilsháttar hefur dregið úr virkninni frá því í gærkveldi. Þó má enn búast við stórum skjálftum á svæðinu.

Jarðskjálftahrinan sem hófst á laugardag syðst í Eyjafjarðarál heldur áfram. Í gær, mánudaginn 22. október, mældust allnokkrir skjálftar á tímabilinu frá kl. 1:00 til 8:00 á svæði nokkru suðaustan við þann stað þar sem meginhrinan og 5,6 skjálftinn voru staðsett. Þeir voru því heldur nær Húsavíkur-Flateyjarmisgenginu.

Jarðskjálftahrina með upptök syðst í Eyjafjarðarál úti fyrir Norðurlandi hefur verið í gangi síðan í gær, 20. október. Upptökin eru um 19 – 20 kílómetra norðnorðaustur af Siglufirði og nokkru suðvestar en skjálftahrina sem varð í september síðastliðnum.

Tæplega 1500 jarðskjálftar mældust með SIL-mælakerfi Veðurstofu Íslands í september. Stærstu skjálftar mánaðarins urðu í Tjörnesbrotabeltinu, í skjálftaröð syðst í Eyjafjarðarál. Þeir voru yfir 4 að stærð og fundust víða norðanlands.

Svandís Svavarsdóttir umhverfis- og auðlindaráðherra opnaði norðurljósaspá Veðurstofunnar á fundi sem haldinn var undir formerkjum átaksins „Ísland allt árið“ hjá Íslandsstofu miðvikudaginn 10. október. Norðurljósaspáin er sú fyrsta sinnar tegundar í heiminum. Ekki hefur áður verið reynt að spá fyrir um líkur á því að sjáist til norðurljósa, miðað við landshluta og með tilliti til skýjafars og virkni.

Veðurfræðifélagið heldur haustþing sitt fimmtudaginn 11. október 2012. Fundur verður settur kl. 13 í Forgarði á Veðurstofu Íslands að Bústaðavegi 7. Bæði þingið og Veðurfræðifélagið eru opin öllum sem hafa áhuga á veðri og veðurfari. Að þessu sinni eru erindin sex talsins og stutt ágrip erindanna má finna á vefsíðu félagsins.

Nýlega var sett upp sjálfvirk stöð á Staðarhóli í Þingeyjarsýslu. Einnig var þjónusta aukin frá Grímsstöðum á Fjöllum. Nú er hægt að nálgast upplýsingar um hita, vind og raka þaðan allan sólarhringinn úr sjálfvirkum mælum.

Septembermánaðar verður að þessu sinni einkum minnst fyrir óvenjulegt hríðarveður sem gerði um landið norðanvert dagana 9. til 11. Mikið fannfergi og ísing fylgdi veðrinu og olli hvort tveggja miklu tjóni, ísing felldi raflínur og fé fennti þúsundum saman. Enn er ekki ljóst hversu margt fórst.

Á Vísindavöku kynnir Veðurstofan "íslensku ofureldstöðina"; eða rannsóknir og kortlagningu eldfjallavár. Auk þess verður fjallað um jöklamælingar og margt fleira. Vísindavaka Rannís er haldin í Háskólabíói föstudaginn 28. september kl. 17-22.

Vísindakaffi á vegum Vísindavöku verður haldið á Súfistanum við Laugaveg miðvikudagskvöldið 26. september. Jöklafræðingur frá Veðurstofu Íslands veltir upp spurningum: Hve mikil var leysingin á jöklum landsins í sumar? Hvert er áætlað framlag jöklaleysingar á Íslandi til hækkunar sjávarborðs á þessari öld? Hverjar verða afleiðingar þessara breytinga fyrir vatnsorkunýtingu og samgöngur? Hvernig geta rannsóknir á Íslandi gagnast könnun Mars og ístungla sólkerfisins?

Talsverð jarðskjálftavirkni syðst í Eyjafjarðarál úti fyrir Norðurlandi  hefur staðið yfir með hléum frá 14. september. Fram til dagsins í dag hafa mælst fjórir jarðskjálftar yfir 4 að stærð.

Hinn 16. september ár hvert er tileinkaður íslenskri náttúru. Daginn ber að þessu sinni upp á sunnudag. Þá mun Svandís Svavarsdóttir, umhverfis- og auðlindaráðherra, heimsækja Veðurstofu Íslands og lesa veðurfréttir kl. 10.

Tæplega 1000 jarðskjálftar mældust með SIL-mælakerfi Veðurstofu Íslands í ágúst, talsvert færri en í júlí. Stærsti skjálfti mánaðarins varð milli Bláfjallaskála og Vífilsfells þann 30. ágúst og var hann 4,6 stig. Undir mánaðamót ágúst-september varð smáhlaup úr vestari Skaftárkatli.

Í tilefni af uppsetningu veðursjár á Austurlandi fyrr á árinu býður Veðurstofa Íslands til athafnar við veðursjána þar sem hún er staðsett við Teigsbjarg á Fljótsdalsheiði, miðvikudaginn 12. september. Árni Snorrason forstjóri tekur veðursjána formlega í notkun kl. ellefu og síðan verður boðið til hádegisverðar á Skriðuklaustri, þar sem byggingarsaga veðursjárinnar verður sögð í máli og myndum.

Tæknimenn Veðurstofunnar hafa, ásamt þjónustuaðilum, unnið að lagfæringum á gagnagrunni Veðurstofunnar. Vonast er til að sú vinna skili sér í bættum uppitíma. Ef allt fer að óskum verða notendur vedur.is ekki varir við frekari hnökra í birtingu veðurspáa og annarra gagna á vefnum.

Vegna bilunar í gagnagrunni Veðurstofunnar hefur birting gagna á vefnum verið gloppótt og virkni mismikil. Flestar kviku síðurnar virka vel í bili. Þó er enn verið að skoða málið og leita varanlegrar lausnar.

Vegna bilunar í miðlægum gagnagrunni eru ákveðin kerfi Veðurstofunnar niðri. Þetta hefur áhrif á gagnasöfnun og veðurspár. Verið er að vinna í viðgerðum. Önnur frétt verður birt, strax og tekst að koma þessu í lag.

Mánuðurinn var hlýr um allt land, hlýjastur að tiltölu á Norður- og Vesturlandi, en suðaustanlands og sunnan til á Austfjörðum var hann ekki langt yfir meðallagi. Mjög þurrt var um landið norðvestanvert og er mánuðurinn í flokki þeirra þurrustu á þeim slóðum.

Staðfest er að hlaup hefur komið frá vestari Skaftárkatli. Hlaup frá vestari katlinum eru minni en hlaup frá eystri katlinum og því einnig hættuminni. Það er þó mælt með því að fólk fari ekki að útfalli hlaupsins þar sem hætta er á brennisteinsgasi á því svæði. Vísbendingar um hlaupið hafa verið greinilegar síðan 25. ágúst. Hlaupið er lítið og vatnið hefur verið nokkra daga að ferðast undir Vatnajökli, sem er lengri tími en vant er.

Fimmtudaginn 30. ágúst kl. 11:59 varð jarðskjálfti 4,6 að stærð með upptök á um 6 kílómetra dýpi rétt norðan við skíðasvæðið í Bláfjöllum á Reykjanesskaga.

Undanfarna áratugi hefur flatarmál hafísbreiðunnar á norðurheimskauts-svæðinu minnkað í takt við hlýnun svæðisins. Hafís á norðurhveli er mestur síðla vetrar og þekur þá 14 - 15 milljónir ferkílómetra. Á sumrin dregst hafísbreiðan verulega saman og fer niður í 5 - 6 milljónir ferkílómetra.

Hátt í 1500 skjálftar mældust með SIL-mælakerfi Veðurstofunnar í júlí. Stærstu skjálftarnir sem mældust áttu upptök við Jan Mayen, en á og við landið urðu nokkrir um og yfir þrjú stig að stærð. Þeir áttu upptök norður af Tjörnesi, undir Ingólfsfjalli, í Kötluöskju og undir suðvestanverðum Langjökli. Ingólfsfjallsskjálftinn fannst í nágrenninu.

Júlímánuður var mjög hlýr um landið suðvestan- og vestanvert og hiti var yfir meðallagi um land allt. Að tiltölu var kaldast austanlands. Úrkoma var nær allstaðar undir meðallagi en þó var ekki nærri því eins þurrt og í júní. Sólskinsstundir voru óvenjumargar norðanlands og vel yfir meðallagi syðra. Hægviðrasamt var í mánuðinum.

Að kvöldi 22. júlí 2012 mældist loftþrýstingur á nokkrum stöðvum sunnanlands lægri heldur en áður er vitað um hérlendis í júlímánuði. Á mönnuðu stöðvunum var lægsta talan 972,8 hPa og mældist á Stórhöfða í Vestmannaeyjum kl. 21 og 6 stundum síðar (23, kl. 3) á Kirkjubæjarklaustri.

Veðurstofan vill vekja sérstaka athygli á versnandi veðri á laugardag. Búist við hvassri suðaustan- og austanátt með rigningu sunnan- og vestantil á landinu. Ferðafólki er bent á að tjöld, hjólhýsi og tengivagnar geta fokið við þessar aðstæður.

Rúmlega 1200 jarðskjálftar mældust með SIL-mælakerfi Veðurstofunnar í júní. Aukin virkni var í Mýrdalsjökli, einkum innan öskjunnar og smáhlaup varð í Múlakvísl. Stærsti skjálfti mánaðarins, 3,7 að stærð, mældist í skjálftahrinu 30 kílómetrum suðaustan Kolbeinseyjar.

Júnímánuður var hlýr um landið vestanvert en fremur kaldur austanlands. Mjög þurrt var á landinu, sérstaklega þó norðvestanlands þar sem mánuðurinn var sá þurrasti sem vitað er um. Sérlega sólríkt var um landið sunnan- og vestanvert. Hægviðrasamt var í mánuðinum.

Vefsíðan Safetravel er rekin af Slysavarnafélaginu Landsbjörg og er hluti af stærra verkefni sem fjöldi aðila kemur að, bæði opinberar stofnanir, fyrirtæki og einstaklingar, í því augnamiði að bæta forvarnir og minnka slys í ferðamennsku og ferðaþjónustu hér á landi. Snjallsímaforritið SOS Iceland er nýjasta viðbótin en hefðbundin ferðaáætlun er í fullu gildi.

Hátt í 1300 jarðskjálftar mældust með SIL jarðskjálftamælakerfi Veðurstofunnar í maí. Helsti atburður var skjálftaröð við Herðubreið, sem hófst með skjálfta rúmlega þrír að stærð um miðjan mánuðinn. Hundruð eftirskjálfta fylgdu í kjölfarið. Skjálftavirkni við Húsavík sem hófst í lok apríl hélt áfram í maí. Stærstu skjálftarnir sem mældust í mánuðinum voru lengst suður á Reykjaneshrygg og norður á Kolbeinseyjarhrygg.

Miðvikudaginn 13. júní flytur Michael E. Mann, einn þekktasti loftslags-vísindamaður samtímans, erindi í Háskóla Íslands. Hann mun þar tala um rannsóknir á loftslagsbreytingum og umræðuna um loftslagsbreytingar, sem stundum er mjög úr takt við þær vísindarannsóknir sem æskilegt væri að umræðan byggði á.

Mánuðurinn var mjög kaflaskiptur. Hlýtt var fyrstu tvo dagana en síðan gerði kuldakast sem stóð nær samfellt fram til 21. Þá hlýnaði og síðustu vikuna var mjög hlýtt um meginhluta landsins. Hiti komst m.a. yfir 20 stig sex daga í röð, 25. til 30.

Veðurfræðifélagið heldur sumarþing sitt þriðjudaginn 29. maí 2012. Þingið verður haldið í nýjum húsakynnum eða í Forgarði á Veðurstofu Íslands að Bústaðavegi 7. Þingið og Veðurfræðifélagið eru opin öllum sem hafa áhuga á veðri og veðurfari. Að þessu sinni eru erindin 6 talsins.

Um 1300 jarðskjálftar mældust með SIL-mælakerfi Veðurstofunnar í apríl. Mesta virknin var við Húsmúla á Hellisheiði og á Norðurlandi, 500 á hvoru svæði. Smáhlaup hófst í Múlakvíst í apríllok.

Í gær þann 14. maí kl. 12:45 varð jarðskjálfti rúmlega 3 að stærð með upptök um 3-4 km suðvestur af Herðubreið.  Í kjölfarið hefur fylgt jarðskjálftahrina á svæðinu með tugum smáskjálfta.

Tíðarfar í apríl var hagstætt um meginhluta landsins. Þó var frekar svalt við austurströndina. Mjög þurrt var víða um landið sunnanvert. Apríl var kaldari en mars á svæðinu frá norðanverðum Vestfjörðum austur um Norðurland og suður til Hornafjarðar.

Á málþingi á Veðurstofu Íslands verða kynntar niðurstöður úr verkefni sem ber heitið Loftslagsbreytingar og áhrif þeirra á orkukerfi og samgöngur (LOKS). Þátttakendur í verkefninu eru sérfræðingar í þróun og notkun fræðilegra líkana, sem beitt er við rannsóknir á veðurfari, vatnafari og jökulafkomu með væntanlegar breytingar á fyrri hluta 21. aldar í huga.

Lítil skjálftavirkni mældist í mars, alls 725 skjálftar. Helsti atburður mánaðarins var skjálftaröð með upptök suðaustan Helgafells, en stærstu skjálftarnir fundust víða.

Í mars kom í ljós að Öskjuvatn var orðið íslaust, sem þykir óvanalegt og gerist öllu jafna ekki fyrr en í lok júní eða byrjun júlí. Óvenjuhlýtt var á landinu í mars, en önnur vötn á hálendinu, t.d. Hágöngulón, svo og Mývatn, eru ekki orðin íslaus þrátt fyrir það.

Mánuðurinn var mjög hlýr, sérstaklega um landið norðan- og austanvert en á þeim slóðum var hann meðal þeirra tíu hlýjustu frá upphafi mælinga. Mjög úrkomusamt var á Suður- og Vesturlandi. Snjólétt var á landinu.

Fimmtudaginn 29. mars 2012 mældist hámarkshiti í Kvískerjum í Öræfum 20,5 stig. Þetta er langhæsti hiti sem mælst hefur í mars hér á landi. Gamla metið var 18,8 stig og var sett á Eskifirði 28. mars 2000.

Snjóflóð féll úr Tvísteinahlíð ofan heilsugæslustöðvarinnar við Engihlíð í Ólafsvík þann 19. mars sl. Gera má ráð fyrir að snjóflóðið hefði orðið margfalt stærra, og jafnvel náð niður að heilsugæslunni ef stoðvirkin hefðu ekki dregið úr snjómagninu sem fór að stað. Þetta er fyrsta dæmið hér á landi um að stoðvirki á upptakasvæðum hafi komið í veg fyrir eða dregið úr stærð snjóflóðs.

Ársfundur Veðurstofunnar var haldinn fimmtudaginn 22. mars, á degi vatnsins. Umhverfisráðherra flutti stutt ávarp, forstjóri hélt erindi um stöðu stofnunarinnar og áfanga í starfi og fimm starfsmenn sögðu frá verkefnum. Ársskýrsla fyrir árið 2011 kom út og meginsalur bókasafns stofnunarinnar var vígður.