Í gær þann 14. maí kl. 12:45 varð jarðskjálfti rúmlega 3 að stærð með upptök um 3-4 km suðvestur af Herðubreið.  Í kjölfarið hefur fylgt jarðskjálftahrina á svæðinu með tugum smáskjálfta.

Tíðarfar í apríl var hagstætt um meginhluta landsins. Þó var frekar svalt við austurströndina. Mjög þurrt var víða um landið sunnanvert. Apríl var kaldari en mars á svæðinu frá norðanverðum Vestfjörðum austur um Norðurland og suður til Hornafjarðar.

Á málþingi á Veðurstofu Íslands verða kynntar niðurstöður úr verkefni sem ber heitið Loftslagsbreytingar og áhrif þeirra á orkukerfi og samgöngur (LOKS). Þátttakendur í verkefninu eru sérfræðingar í þróun og notkun fræðilegra líkana, sem beitt er við rannsóknir á veðurfari, vatnafari og jökulafkomu með væntanlegar breytingar á fyrri hluta 21. aldar í huga.

Lítil skjálftavirkni mældist í mars, alls 725 skjálftar. Helsti atburður mánaðarins var skjálftaröð með upptök suðaustan Helgafells, en stærstu skjálftarnir fundust víða.

Í mars kom í ljós að Öskjuvatn var orðið íslaust, sem þykir óvanalegt og gerist öllu jafna ekki fyrr en í lok júní eða byrjun júlí. Óvenjuhlýtt var á landinu í mars, en önnur vötn á hálendinu, t.d. Hágöngulón, svo og Mývatn, eru ekki orðin íslaus þrátt fyrir það.

Mánuðurinn var mjög hlýr, sérstaklega um landið norðan- og austanvert en á þeim slóðum var hann meðal þeirra tíu hlýjustu frá upphafi mælinga. Mjög úrkomusamt var á Suður- og Vesturlandi. Snjólétt var á landinu.

Fimmtudaginn 29. mars 2012 mældist hámarkshiti í Kvískerjum í Öræfum 20,5 stig. Þetta er langhæsti hiti sem mælst hefur í mars hér á landi. Gamla metið var 18,8 stig og var sett á Eskifirði 28. mars 2000.

Snjóflóð féll úr Tvísteinahlíð ofan heilsugæslustöðvarinnar við Engihlíð í Ólafsvík þann 19. mars sl. Gera má ráð fyrir að snjóflóðið hefði orðið margfalt stærra, og jafnvel náð niður að heilsugæslunni ef stoðvirkin hefðu ekki dregið úr snjómagninu sem fór að stað. Þetta er fyrsta dæmið hér á landi um að stoðvirki á upptakasvæðum hafi komið í veg fyrir eða dregið úr stærð snjóflóðs.

Ársfundur Veðurstofunnar var haldinn fimmtudaginn 22. mars, á degi vatnsins. Umhverfisráðherra flutti stutt ávarp, forstjóri hélt erindi um stöðu stofnunarinnar og áfanga í starfi og fimm starfsmenn sögðu frá verkefnum. Ársskýrsla fyrir árið 2011 kom út og meginsalur bókasafns stofnunarinnar var vígður.

Á hverju ári í rúma hálfa öld hefur Alþjóðaveðurfræðistofnunin kynnt starfsemi sína á alþjóðaveðurdeginum, 23. mars. Á þessu ári fer kynningin fram undir orðunum: Gæðum framtíðina mætti veðurs og vatns.

Ársfundur Veðurstofu Íslands verður haldinn á degi vatnsins, næstkomandi fimmtudag, 22. mars. Að loknu ávarpi umhverfisráðherra og kynningu forstjóra verða flutt þrjú erindi: um eftirlit og spá, um eldfjallarannsóknir og áhættumat og um loftslagsverkefni á Veðurstofu Íslands.

Í febrúarmánuði voru staðsettir alls 1196 jarðskjálftar. Þeir stærstu mældust M_l 3,7 úti fyrir mynni Eyjafjarðar og M_l 3,5 við Eldeyjarboða. Nokkrir skjálftar voru staðsettir suður á Reykjaneshrygg og norður á Kolbeinseyjarhrygg

Þjóðirnar, sem land eiga að norðurskautssvæðinu, hafa á undanförnum árum eflt samstarf veður- og vatnafræðistofnana sinna. Tilgangurinn er sá að styðja við vöktun og rannsóknir á innrennsli ferskvatns inn í Norður-Íshafið og auka þar með skilning á áhrifum hlýnunar á norðurslóðum.

Þann 28. febrúar síðastliðinn samþykkti Alþingi breytingar á lögum um Ofanflóðasjóð. Þessi lagabreyting gerir Ofanflóðasjóði kleift að koma að fjármögnun hættumats vegna íslenskra eldfjalla til næstu þriggja ára.

Mánuðurinn var umhleypingasamur og hlýr. Hlýindin voru að tiltölu mest austanlands þar sem hiti á Fljótsdalshéraði var meira en 4 stigum ofan meðallags. Úrkoma var mikil um allt sunnan- og vestanvert landið og var á stöku stöð meiri heldur en hún hefur áður mælst í febrúar.

Þann 1. mars 2012 klukkan 01:03 varð jarðskjálfti suðaustan við Helgafell, sunnan Hafnarfjarðar. Hann var 4,2 að stærð og fannst víða á höfuðborgarsvæðinu og einnig á Akranesi.

Snjóflóðaforsíða er nú í boði á vef Veðurstofunnar. Þar er kort með rauntímaupplýsingum um snjóflóð á landinu síðastliðna viku. Notendur eru hvattir til að tilkynna snjóflóð sem þeir verða varir við.

Norræna ráðherranefndin hefur gefið út skýrsluna Loftslagsbreytingar og áhrif þeirra á endurnýjanlega orkugjafa á 21. öld. Er það lokaskýrsla um sameiginlegt rannsóknarverkefni Norðurlanda og Eystrasaltslanda: Climate and Energy Systems (CES). Verkefnisstjóri CES er Árni Snorrason, forstjóri Veðurstofu Íslands, og aðalritstjóri lokaskýrslunnar er Þorsteinn Þorsteinsson, jöklafræðingur á Veðurstofunni.

Í lok síðasta árs stóð innanríkis-ráðuneytið fyrir úttektinni Hvað er spunnið í opinbera vefi. Niðurstöðurnar voru birtar fyrir skömmu. Þetta er í fjórða skipti sem sambærileg úttekt er gerð, áður hafa þær verið gerðar 2005, 2007 og 2009.

Veðurfræðifélagið heldur þorraþing sitt þriðjudaginn 14. febrúar 2012. Fundur verður settur kl. 13 í Víðgelmi í Orkugarði að Grensásvegi 9. Þingið og Veðurfræðifélagið eru opin öllum sem hafa áhuga á veðri og veðurfari.

Í janúar mældust um 850 jarðskjálftar með SIL-mælakerfi Veðurstofu Íslands. Flestir áttu upptök við Húsmúla á Hengilssvæðinu en þar mældust um 250 smáskjálftar. Tæplega 150 skjálftar urðu í Mýrdalsjökli, flestir innan Kötluöskjunnar. Stærsti skjálfti mánaðarins varð að kvöldi 3. janúar, Ml 3,9, rétt vestan Krýsuvíkur og fannst víða á Reykjanesskaga, höfuðborgarsvæðinu og á Akranesi.

Á hverjum degi fara nokkur veðurtungl yfir Ísland. Sunnudaginn 5. febrúar fékkst falleg mynd sem sýnir snæviþakið landið, hafís í Grænlandssundi og skýjabakka yfir suðvesturhluta landsins.

Mánuðurinn telst úrkomu- og illviðrasamur um meginhluta landsins. Suðvestanlands var venju fremur snjóþungt og sömuleiðis var allmikill snjór á Vestfjörðum og sums staðar norðanlands. Hiti var ofan við meðallag um land allt, mest austanlands.

Sú breyting varð nýlega að hafístilkynningar berast sjálfvirkt og að sólarhringsvakt Veðurstofunnar birtir þær jafnóðum á vefnum. Einnig eru birt kort af aðstæðum eins og þurfa þykir.

Hinn 17. janúar var málþingið Mælingar og hermun gosösku í andrúmslofti fyrir flugsamgöngur haldið í Orkugarði að Grensásvegi 9. Veðurstofa Íslands, Háskóli Íslands, Háskólinn í Reykjavík og Reiknistofa í veðurfræði stóðu að málþinginu.

Rúmlega 1400 jarðskjálftar mældust með SIL-mælakerfi Veðurstofu Íslands í mánuðinum. Mesta virknin var við Húsmúla á Hengilssvæðinu en þar mældust tæplega 600 jarðskjálftar og rétt tæpir 400 í Mýrdalsjökli, flestir innan Kötluöskjunnar. Stærsti skjálfti mánaðarins varð í byrjun mánaðar um það bil 14 kílómetrum austan Akureyrar og var hann rúmlega þrjú stig..

Nær 300 fræðimenn frá Norðurlöndum og víðar sækja þrítugasta vetrarmót norrænna jarðvísindamanna, sem haldið er í Hörpu í þessari viku en það var síðast haldið hérlendis árið 2002. Jarðfræðafélag Íslands skipuleggur ráðstefnuna í samstarfi við ýmsar stofnanir hérlendis.

Óvenjukalt var framan af mánuðinum en síðari hlutinn var nærri meðallagi hvað hita áhrærir. Snjór var þaulsetinn á jörðu um mestallt land og mánuðurinn í hópi allra snjóþyngstu desembermánaða um landið suðvestanvert. Slæma hálku gerði í blotum síðari hluta mánaðarins og víða var freði á jörð í lok hans.

Tíðarfar var lengst af hagstætt á árinu um meginhluta landsins. Síðari hluti vors og fyrri hluti sumars teljast þó óhagstæð um stóran hluta landsins en þeirrar erfiðu tíðar gætti lítið á Suðvesturlandi.

16.12.2011. Ný móttaka Veðurstofu Íslands var opnuð formlega í dag að Bústaðavegi 7. Veðurstofan er nú til húsa í tveimur byggingum, Bústaðavegi 7 og 9. Svandís Svavarsdóttir umhverfisráðherra tók hina nýju aðstöðu formlega í notkun. Lengi hefur staðið til að leysa húsnæðisvanda stofnunarinnar.

Um 1.300 jarðskjálftar mældust með SIL mælakerfi Veðurstofu Íslands í nóvember 2011. Stærsti jarðskjálftinn var 3,5 að stærð með upptök í sunnanverðri Kötluöskju þann 8. nóvember kl. 09:50. Hann fannst vel í Vík og nágrenni.

9.12.2011. Líkur eru á því að glitský sjáist í kvöld og í fyrramálið.

2.12.2011 Jarðskjálfti varð kl. 19:22 í Vaglafjalli u.þ.b. 14 kílómetrum austan Akureyrar. Hann var 3,2 stig að stærð.

Óvenju hlýtt var lengst af í nóvember og þótt síðustu dagarnir hafi verið kaldir er mánuðurinn samt í hópi hlýjustu nóvembermánaða frá upphafi mælinga. Hlýjast var að tiltölu austanlands en heldur svalara um landið norðvestanvert. Úrkoma var í meira lagi um land allt, mest þó að tiltölu suðaustanlands. Lengst af var snjólítið.

Málþing um áhrif loftslagsbreytinga á náttúrufar og lífríki verður haldið föstudaginn 2. desember 2011 kl. 13:00 á Grand Hótel. Halldór Björnsson, verkefnisstjóri loftslagsrannsókna á Veðurstofu Íslands, heldur erindi er nefnist Hnattrænar loftslagbreytingar og áhrif þeirra. Hvert stefnir?

Hugtakið freðhvolf vísar í vatn á föstu formi, hvar sem það finnst á jörðunni, sem ís, snjór eða hafís. Veðurstofan tekur þátt í verkefnum er varða rannsóknir á heimskautssvæðunum og vöktun freðhvolfsins.

Alls voru 2159 jarðskjálftar mældir með SIL-mælakerfi Veðurstofunnar í október. Mesta virknin var undir Mýrdalsjökli en þar mældust rúmlega 500 jarðskjálftar, þar af tæplega 400 innan Kötluöskjunnar. Skjálftahrinur voru við Húsmúla á Hellisheiði og suðvestan við Hafnaberg á Reykjanesi.

Októbermánuður var fremur hlýr um mestallt land, hlýjastur að tiltölu austanlands en svalastur á Vestfjörðum. Úrkomusamt var í flestum landshlutum og óvenjumikil úrkoma var á fáeinum veðurstöðvum.

Emmanuel Pagneux, starfsmaður Veðurstofu Íslands,  ver hinn 28. október næstkomandi doktorsritgerð sína Floods in the Ölfusá basin, Iceland: A geographic contribution to the assessment of flood hazard and management of flood risk við Líf- og umhverfisvísindadeild Háskóla Íslands. Athöfnin fer fram í stofu 132 í Öskju og hefst kl. 15:00.

Hátt í 3.000 jarðskjálftar mældust í september. Rúmlega helmingur átti upptök á Hellisheiði, en þar hefur fjöldi smáskjálfta orðið vegna niðurdælingar á vatni við Hellisheiðarvirkjun. Mikil virkni var einnig í Mýrdalsjökli en um 500 skjálftar mældust þar.

Haustþing Veðurfræðifélagsins verður haldið þriðjudaginn 18. október 2011 kl. 13-16 í Orkugarði, Grensásvegi 9.  Þingið og Veðurfræðifélagið eru opin öllum sem hafa áhuga á veðri og veðurfari. Að þessu sinni fjalla erindin einkum um veður og orku.

13.10.2011. Árlegur samráðsfundur snjóathugunarmanna og snjóflóðavaktar á Veðurstofunni í Reykjavík stendur yfir. Við upphaf snjóflóðavaktar, ár hvert, hittast þeir ásamt öðru ofanflóðastarfsfólki Veðurstofunnar á fundi þar sem rætt er um mál sem tengjast vöktun á snjóflóðum og skriðuföllum.

Fundur var haldinn í CRAICC verkefninu að Hótel Rangá í október 2011. Verkefnið lýtur að samspili íss og andrúmslofts á norðurslóðum á tímum loftslagsbreytinga.

Advances in Earthquake Prediction: Research and Risk Mitigation er heiti á nýútkominni bók eftir Ragnar Stefánsson jarðskjálftafræðing. Forlögin Springer og Praxis gáfu bókina út. Hún er 245 síður og með fjölda skýringarmynda.

5.10.2011. Upp úr kl 2:50 síðastliðna nótt hófst snörp skjálftahrina í Mýrdalsjökli. Rúmri klukkustund síðar varð önnur heldur minni og þriðja hrinan, enn minni, fylgdi fljótlega í kjölfarið. Eftir það hafa stakir skjálftar mælst en tíðni þeirra hefur minnkað verulega.

Mánuðurinn var hlýr hér á landi. Hiti var vel yfir meðallagi í öllum landshlutum. Hlýjast að tiltölu varð suðvestanlands. Hitavik voru minnst á Vestfjörðum. Mjög úrkomusamt var suðaustanlands en annars var frekar þurrt langt fram eftir mánuðinum. Mikið rigndi á Suður- og Vesturlandi síðustu viku mánaðarins.

Ráðstefna norrænna jarðskjálftafræðinga verður haldin í Reykjavík dagana 5. – 7. október næstkomandi. Ráðstefnan er haldin til skiptis á Norðurlöndum og er því hér á fimm ára fresti.

Vísindavaka RANNÍS fór fram föstudaginn 23. september  í samstarfi við Háskóla Íslands í tilefni 100 ára afmælis hans. Veðurstofan tók þátt í vökunni undir yfirskriftinni Veðurstofa Íslands - vöktunarmiðstöð eldfjalla. Vel tókst til og þakkar Veðurstofan öllum þeim sem sýndu verkefnum stofnunarinnar áhuga.

23.09.2011 Fjöldi skjálfta hefur mælst við Hellisheiðarvirkjun. Stærsti skjálftinn að stærð 3,4 varð kl. 15:22. Hann fannst vel í Hveragerði, Mosfellsbæ og víðar. Samkvæmt Orkuveitu Reykjavíkur hefur vatni verið dælt niður í nýja borholu á svæðinu.

Veðurstofan tekur þátt í Vísindavöku Rannís í Háskólabíói föstudaginn 23. september kl. 17-22 en hún er haldin að þessu sinni í samstarfi við Háskóla Íslands í tilefni 100 ára afmælis hans. Vísindakaffi eru að auki haldin á Súfistanum öll kvöld vikunnar og síðastliðinn þriðjudag reifaði Halldór Björnsson, verkefnisstjóri loftslagsrannsókna á Veðurstofunni, spurninguna: "Kuldinn síðasta sumar afsannar hlýnun jarðar! ...er það ekki?"

Miðvikudaginn 14. september fóru starfsmenn frá Veðurstofu Íslands og Jarðvísindastofnun Háskólans á Mýrdalsjökul til að yfirfara tækjabúnað fyrir veturinn.

Rúmlega 1400 jarðskjálftar mældust í mánuðinum. Mesta virknin var undir Mýrdalsjökli en þar mældust yfir 400 skjálftar. Á þriðja hundrað skjálftar mældust einnig við Kleifarvatn.

Talsvert jarðvegs- og öskufok getur verið á sunnanverðu landinu í norðanátt. Ýmis mælitæki sýna þetta.

Á degi íslenskrar náttúru, föstudaginn 16. september, býður Veðurstofan gestum að líta inn í vaktherbergið og hlýða á erindi um vatnsbúskap á Íslandi.

06.09.2011 Tíðnigreining óróa í Mýrdalsjökli bendir til hlaupóróa. Leiðni er há og rennsli mikið í Múlakvísl. Um lítið hlaup virðist vera að ræða.

Tíðarfar telst hagstætt um mestallt land. Hiti var yfir meðallagi um landið sunnan- og vestanvert, í meðallagi norðanlands en á Austurlandi var ívið kaldara heldur en í meðallagi. Vestanlands var þurrt lengst af og úrkoma var undir meðallagi um stóran hluta landsins. Úrkomusamt var allra austast á landinu.

Unnið verður hættumat fyrir eldgos á Íslandi. Hættumatið verður unnið samkvæmt hættumatsramma Alþjóðaveðurfræðistofnunarinnar (WMO) og Sameinuðu þjóðanna en góður árangur hefur náðst í hættumati vegna ofanflóða með þessari aðferðafræði.

Dagana 23.-25. ágúst heimsóttu starfsmenn vatnamælingadeildar norsku vatns- og orkumálastofnunarinnar, Norges vassdrags- og energidirektorat, Veðurstofu Íslands. Fulltrúar beggja stofnana kynntu starfsemina í húsakynnum Veðurstofunnar við Bústaðaveg og skoðuðu búnað og tæki.

Við gosið í Eyjafjallajökli í apríl 2010 fengu vísindamenn í fyrsta sinn tækifæri til að rannsaka jökulhlaup frá jökulhulinni eldkeilu á Íslandi. Fimmtudaginn 25. ágúst 2011 voru flóðin sem urðu í kjölfar gossins rædd á gagnvirkri vinnustofu, sem haldin var á Veðurstofu Íslands. Vegna fjölda erlendra fyrirlesara var vinnustofan haldin á ensku.

17.8.2011. Árið 1992 var hámarksstyrkur koltvísýrings í andrúmslofti á Íslandi skv. mælingum á Stórhöfða rúmlega 362 ppm en styrkurinn fór yfir 400 ppm nú í vor. Líklegt er að styrkurinn hafi ekki verið svona hár í hundruð þúsunda ára.

Um 1350 jarðskjálftar mældust með SIL-kerfi Veðurstofunnar í júlí. Hlaup kom úr sigkötlum bæði í Mýrdalsjökli og Vatnajökli.

Sérlega glæsileg silfurský sáust á Vesturlandi aðfaranótt sunnudagsins 7. ágúst 2011. Þau náðu upp í hvirfilpunkt himins. Einnig sáust silfurský næstu tvær nætur.

5.8.2011 Verulega hefur dregið úr líkum á hlaupi úr eystri Skaftárkatli. Mæligildi aurs og leiðni eru ennþá há en rennsli árinnar hefur ekki aukist.

4.8.2011. Hlaup úr eystri Skaftárkatli hefur enn ekki komið fram í auknu rennsli í Skaftá. Hlaup úr vestari Skaftárkatli hefur ekki gengið alveg niður.

3.8.2011 Fyrstu merki þess að hlaup geti hafist úr eystri Skaftárkatli hafa komið fram á mælum Veðurstofunnar. Órói hefur mælst á mælum í kringum vestanverðan Vatnajökul frá því eftir miðnætti í nótt og grugg hefur aukist mikið á mæli í Skaftá við Sveinstind.

Fremur hlýtt var í júlí 2011 og hiti yfir meðallagi um nær allt land. Kaldast að tiltölu var við Austfirði og austast á Suðausturlandi en hlýjast að tiltölu á Vestfjörðum. Þurrt var um landið norðanvert.

Rennsli í Skaftá hefur aukist á ný. Leiðni hækkar áfram en aur og grugg hefur vaxið á ný. Merki eru um að hlaupið hafi úr vestari Skaftárkatli.

Vaxandi leiðni og „grugg“ á ljósgleypnimæli Veðurstofunnar við Sveinstind (V299) bendir til þess að hlaup muni hefjast innan skamms í Skaftá.

Veðurstofa Íslands hlaut verðlaun ESRI, sem er leiðandi fyrirtæki í þróun landfræðilegra upplýsingakerfa, fyrir framúrskarandi árangur í notkun slíks hugbúnaðar (GIS).

Um 1050 jarðskjálftar mældust með SIL-kerfi Veðurstofunnar í júní. Helstu atburðir í mánuðinum voru aukin skjálftavirkni undir Geitlandsjökli og í Kötluöskju.

Sigketill hefur myndast í Vatnajökli rétt austur af Hamrinum, um það bil 2 km að lengd. Þetta sást þegar flogið var yfir Lokahrygg til að leita upptaka hlaupsins sem kom í Köldukvísl í gærmorgun.

Um klukkan 7 í gærmorgun mældist órói á jarðskjálftamælum á svæðinu við norðvestanverðan Vatnajökul. Veðurstofan hefur fylgst með óróanum frá því í gær í samvinnu við Almannavarnir og aðrar vísindastofnanir.

Hlaupið sem kom úr sigkötlum í Mýrdalsjökli síðastliðna nótt, og hreif með sér brúna yfir Múlakvísl, kom úr þremur þekktum sigkötlum en einn nýr myndaðist. Í flóðavöktunarkerfi Mýrdalsjökuls hafa verið reknir mælar til vöktunar og eftirlits með Múlakvísl.

Kalt var víðast hvar á landinu í júní og tíð erfið um landið norðanvert. Sérlega kalt var norðaustanlands og inn til landsins á Austurlandi og þarf að fara marga áratugi aftur í tímann til að finna ámóta kaldan júnímánuð á þeim slóðum. Hiti var hins vegar í kringum meðallag eða rétt ofan við það á litlu svæði á Suðvesturlandi.

Starfsmaður Veðurstofu Íslands, Emmanuel P. Pagneux, hefur hlotið hin virtu Tison verðlaun en þau veitir IAHS, Alþjóðasambandið um vatnavísindi, fyrir rannsóknir í vatnafræði.

Veðurleikurinn er einfaldur og snýst um að gera sem réttastar veðurspár. Frá mánudegi til föstudags gera þátttakendur spá fyrir tvo staði, tvo daga fram í tímann. Spárnar eru síðan bornar saman við veðurathuganir og stig gefin eftir því hversu réttar þær reynast vera. Sá vinnur sem fær flest stig samanlagt fyrir leikdagana fimm.

Dagana 16 - 17. júní var 75. þing ECMWF haldið. Þar var Ísland formlega boðið velkomið sem fyrsta nýja aðildarþjóðin síðan miðstöðin var stofnuð.

Rúmlega 1000 jarðskjálftar mældust með SIL-kerfi Veðurstofunnar í maí. Helsti atburður mánaðarins var eldgosið í Grímsvötnum, sem stóð frá 21. til 28. maí.

Veðurstofan hefur kynnt tillögu að ofanflóðahættumati fyrir Mosfellsbæ á vegum hættumatsnefndar Mosfellsbæjar. Frestur til að koma athugasemdum á framfæri er til 8. júlí 2011.

Sumarþing Veðurfræðifélagsins var haldið 6. júní 2011 í Orkugarði að Grensásvegi 9. Þingið og Veðurfræðifélagið eru opin öllum sem hafa áhuga á veðri og veðurfari. Að þessu sinni fjallaði fyrri hluti erindanna um greiningar á veðurfari og aðferð til reikninga á staðbundnu veðri. Seinni hluti erindanna sneri að eldgosunum í Grímsvötnum 2011 og Eyjafjallajökli.

Tíðarfar í maí skipti mjög í tvö horn. Dagana 2. til 10. var hiti langt yfir meðallagi og vel yfir því fram til 19. Þá kólnaði verulega, sérlega kalt var þá í nokkra daga og svöl tíð hélst til mánaðamóta. Norðanáhlaup gerði dagana 23. og 24. og snjóaði þá víða norðanlands og sums staðar á Austurlandi snjóaði mikið og varð ófærð þar á fjallvegum og truflanir á umferð í byggð.

Veðurstofan gerir nákvæmar mælingar og veitir örar upplýsingar um gosmakkarhæð o.fl. en það eru megin inntaksgögn í reiknilíkani sem London VAAC notar til að gera dreifingarspá. Ákvarðanir um veitingu flugheimilda eru hins vegar teknar af viðeigandi yfirvaldi hvers ríkis. Hér útskýrir náttúruvárstjóri Veðurstofu þetta ferli.

Gosóróinn er nú verulega minni en hann var í gær. Tveir vísindamenn Veðurstofunnar flugu yfir gosstöðvarnar í gærkveldi.

Verið að leita að lógói (myndmerki) fyrir samnorrænt verkefni og hefur verið ákveðið að efna til samkeppni þar sem Vestfirðingar eru sérstaklega hvattir til að senda inn tillögur. Skila skal í síðasta lagi 6. júní.

Veðurstofan notar bæði LiDAR til að sjá öskulög og veðursjár til að fylgjast með gosmekkinum.

Gosmökkurinn hefur verið í 10 - 11 km hæð í dag. Miklar eldingar voru í mekkinum í gærkvöldi og nótt.

Í kvöld, laugardagskvöldið 21. maí 2011, flugu vísindamenn að gosstöðvunum í Grímsvötnum.

Gos hófst í Grímsvötnum undir kvöld. Gosmökkurinn sést allt frá Egilsstöðum til Selfoss.

Alls mældust 615 jarðskjálftar á og við landið í mánuðinum og er það nokkuð minni virkni en í síðasta mánuði. Stærsti skjáfltinn varð norður af Tjörnesi, 3,3 stig

Nú hefur um helmingur af flatarmáli íslenskra jökla verið kortlagður með leysimælingu. Verkefnið er áfangi í kortlagningu allra helstu jökla landsins, sem áformað er að ljúki á næstu þremur árum.

Vefsíðan Safetravel er vettvangur þar sem margir aðilar leggja saman krafta sína í því skyni að efla örugga ferðamennsku. Þar eru upplýsingar um margs konar útivist, íslenska náttúru og veður. Jafnframt eru tenglar inn á landakort, færð á vegum, veðurhorfur, afþreyingu og fleira.

Óvenjumikil ósonþynning átti sér stað í heiðhvolfinu yfir norðurheimsskautinu veturinn 2010-2011. Þynningin virtist tengjast gróðurhúsaáhrifunum og breytingum á veðurfari. Innan svæðisins þar sem ósonið hafði þynnst hvað mest, var ósonlagið þó ekki þynnra en gengur og gerist víðast hvar um miðbik jarðar.

Í tilefni af 90 ára afmæli Veðurstofu Íslands árið 2010 gaf stofnunin út Vedráttu-töflur Sveins Pálssonar (1762-1840), með töflum og veðurlýsingum frá árinu 1792, í 300 tölusettum eintökum. Handritið var myndað og gefið út með prentaðri uppskrift til þess að auðvelda lesturinn.

Það er nú almennt viðurkennt að starf Alþjóðaveðurfræðistofnunarinnar sé ein undirstaða velferðar og öryggis á heimsvísu. Ný markmið um veðurfarsþjónustu munu vonandi stuðla að því að árið 2019 hafi tekist að helminga ársmeðalfjölda dauðsfalla af völdum veðurhamfara, flóða og þurrka auk þess að styðja við sjálfbæra þróun. Veðurstofa Íslands hefur frá stofnun tekið virkan þátt í alþjóðastarfinu enda hefur það reynst ómetanlegt fyrir starfsemi hennar og þar með fyrir íslenskt samfélag.

Dag vatnsins, 22. mars, má rekja til umhverfisráðstefnunnar í Rio de Janeiro árið 1992 og er hann á þessu ári helgaður vatni í borgum. Eins og alkunnugt er var starfsemi Veðurstofu Íslands og Vatnamælinga sameinuð í nýrri stofnun í ársbyrjun 2009, sem sinnir nú margvíslegum umhverfisrannsóknum og vöktun hvað varðar vatn. Veðurstofa Íslands, ásamt Umhverfisstofnun og öðrum fagstofnunum, undirbýr fyrirhugaða innleiðingu Vatnatilskipunar Evrópusambandsins.

Verkefnið „Vindhraðamælingar og sambreytni vinds á Íslandi“ var stutt af Veðurstofu Íslands og Nýsköpunarsjóði námsmanna. Verkefnið var tilnefnt til Nýsköpunarverðlauna forseta Íslands og fékk sérstaka viðurkenningu á Bessastöðum þann 2. mars síðastliðinn.

Ísland varð fullgildur aðili að ECMWF, Reiknimiðstöð evrópskra veðurstofa, eftir að hafa verið aukaaðili frá því seint á 8. áratug síðustu aldar, þegar Svandís Svavarsdóttir umhverfisráðherra og Dominique Marbouty, forstjóri ECMWF, undirrituðu formlegan samning þess efnis í Þjóðmenningarhúsinu.

Tíðarfar í mánuðinum var um margt markvert. Hann var fremur hagstæður, einkum um sunnan- og vestanvert landið, og var með eindæmum sólríkt í Reykjavík. Snörp kuldaköst gerði í byrjun mánaðarins og aftur upp úr honum miðjum og stóðu í rúma viku.

Um 1350 jarðskjálftar mældust með SIL-kerfi Veðurstofunnar í júlí. Hlaup kom úr sigkötlum bæði í Mýrdalsjökli og Vatnajökli.