Sérþjónusta
Veðurfræðileg sérþjónusta
Veðurstofa Íslands veitir margs konar veðurfræðilega sérþjónustu og er þessi sérþjónusta að jafnaði veitt gegn greiðslu. Til þessarar þjónustu telst margs konar úrvinnsla, ráðgjöf, gerð sérspáa, uppsetning og rekstur mælistöðva, hættumat vegna náttúruhamfara og ýmsar umsagnir, t.d. vegna umhverfismats o.fl. Þegar um er að ræða þjónustu á samkeppnismarkaði er hún veitt á forsendum jafnræðis gagnvart einkareknum fyrirtækjum og öðrum ríkisveðurstofum á Evrópska efnahagssvæðinu. Gögn í eigu stofnunarinnar eru ekki seld nema sem nemur afhendingarkostnaði. Stofnunin veitir svokallaða i-rammaþjónustu (iframe) og XML-þjónustu við afhendingu veðurgagna.
Smávirkjanir
Veðurstofa Íslands annast rennslismælingar og rekstur vatnshæðarmæla víða um land. Stjórnvöld standa undir almennum grunnrannsóknum á vatnsauðlindinni. Eigendur vatnsréttinda geta leitað til Veðurstofunnar um mælingar hafi þeir hug á að nýta vatnsauðlindina til raforkuframleiðslu. Æskilegt er að beiðni um mælingar berist til Veðurstofunnar snemma sumars til að lágmarka kostnað.
Um XML þjónustuna
Veðurstofa Íslands býður upp á þjónustu sem gerir fagaðilum kleift að sækja nýjustu staðarspár, textaspár og veðurathuganir. Þessi þjónusta er ókeypis. Hægt er að sækja veðurgögnin á XML, RSS og CSV formi, sjá Leiðbeiningar um notkun XML-þjónustunnar (pdf 0,2 Mb).
Um i-rammaþjónustuna
Veðurstofa Íslands býður upp á þjónustu sem gerir vefstjórum kleift að birta án fyrirhafnar veðurupplýsingar á vefjum sínum. Þessi þjónusta er ókeypis og byggist á i-rammatækninni (iframe).
Útfærðir hafa verið tveir mismunandi i-rammar, annars vegar fyrir staðaspár, textaspár og veðurathuganir og hins vegar fyrir veðurþáttaspár (vinda-, hita- og úrkomuspár). Í báðum tilfellum er hægt að velja veðurspásvæði og tungumál (íslensku eða ensku). Báðir þessir i-rammar eru stórir og er ætlað að vera meginefni heillar síðu. Það er sáraeinfalt að setja þessa i-ramma inn á síður; tekur einungis nokkrar mínútur.
Gjaldskrá
Sjá gjaldskrá (pdf 0,02 Mb) yfir sérþjónustu Veðurstofu Íslands.