Greinar
þunn ský, mjór flugslóði yfir eins og strik

Klósigar og flugslóðar

Laugardaginn 28. júní 2012 mátti líta samspil náttúrulegra og manngerðra skýja yfir vestanverðu landinu.

Flugslóðar, sem eru manngerðir klósigar, myndast þegar heitur og rakur útblástur frá þotum blandast umliggjandi köldu og ómettuðu lofti og úr verður mettuð loftblanda. Þá þéttist vatnsgufan í loftinu og þar sem hiti í flughæð er að jafnaði langt undir frostmarki myndast ískristallar.

Í þessu tilviki var andrúmsloftið mjög þurrt yfir mestum hluta landins, svo að flugslóðar á eftir þotum gufuðu upp mjög hratt. Yfir vestanverðu landinu var loftið aftur á móti fremur rakt og líftími flugslóðanna langur. Þar höfðu þotur flogið yfir þunna klósigabreiðu og flugslóðarnir lágu því ofar. Þetta sást mjög vel, því að skuggar féllu af flugslóðunum á klósigabreiðuna (sjá ljósmynd).

Veður var mjög rólegt, hæg norðlæg eða breytileg átt, og heiðskírt á nær öllu landinu. Allra vestast var þó þessi slæða af klósigum, þunnum ísskýjum, og þvert á hana flugslóðar, eins og sjá má á veðurtunglamynd hér undir.  Reyndar er margt annað líka áhugavert á veðurtunglamyndinni, t.d. hafíshvirflar í Austur-Grænlandsstraumnum.

Sama dag
MODIS veðurtunglamynd, laugardaginn 28. júlí 2012 kl. 12:05. Náttúrleg litmynd sem sýnir vel að heiðskírt var um nær allt land, en allra vestast var klósigabreiða og flugslóðar. MODIS gögn koma frá veðurtunglum NASA (einnig má skoða stærri mynd).

Fleiri myndir

Veðurstofan þiggur með þökkum góðar ljósmyndir af skemmtilegum flugslóðum og/eða klósigum.

Líkt og fjöður
Klósigar á himni hinn 1. október 2013. Í forgrunni er áberandi ský. Líklega er þetta flugslóði; línan upp í gegnum skýið bendir til þess. Skýið minnir á fjöður. Ljósmynd: Guðrún Nína Petersen.





Aðrir tengdir vefir



Þetta vefsvæði byggir á Eplica