Fréttir
Vonarskarð
Í snjó á hálendinu.

Veðurstofa Íslands áréttar nauðsyn þess að notendur lesi textaveðurspár

18.2.2010

Við gerð veðurspáa nýta veðurfræðingar veðurlíkön og veðurathuganir, jafnt á jörðu niðri sem frá veðurtunglum, veðurkönnum, flugvélum og veðursjá, auk þekkingar á veðurfræði og veðurlíkönum, til að meta ástand og útlit hverju sinni.

Veðrið er vaktað allan sólarhringinn alla daga ársins á Veðurstofu Íslands. Veðurspár eru skrifaðar oft á sólarhring og iðulega gefnar út viðvaranir um vá vegna veðurs.

Tölvureiknuðu spánum ber ekki alltaf saman um veigamikil atriði eins og brautir lægða og dýpt þeirra. Sjálfvirkar veðurspár, bæði staðaspár og veðurþáttaspár, eru byggðar á einni tölvureiknaðri spá. Það er því eðlilegt að einhver munur sé á sjálfvirkri spá og textaspá sem tekur tillit til fleiri þátta, auk þess að ná yfir stærra svæði. Það er því ekki að tilefnislausu að notendum vedur.is er bent á að sé munur á sjálfvirkri spá og textaspá þá gildir textaspáin. Sama er gert víðast hvar, til dæmis á vefsíðum yr.no.

Veðurþáttaspárnar sem birtar eru á vedur.is eru reiknaðar í punktum með 3 km millibili fyrir landið og miðin, tvo daga fram í tímann. Ströndin og landslagið koma nokkuð vel fram og því er vindamynstur í samræmi við landslagið þó vindhraði sé ekki alltaf réttur. Augljóst er að tölvuspár sem reiknaðar eru með mun lengra á milli punkta taka minna tillit til raunverulegs landslags.

Auðvelt er að nálgast bæði textaspár og myndrænar sjálfvirkar spár Veðurstofu Íslands á vefnum og í farsíma. Textaspár eru lesnar í útvarpi og á símsvara, auk þess sem viðvaranir og stutt veðurspá er lesin reglulega á helstu útvarpsstöðvum. Skipuleggjendur ferða geta ávallt leitað til vakthafandi veðurfræðinga á Veðurstofu Íslands ef þörf er á, ekki síst þegar misræmi er á milli sjálfvirkra spáa og textaspár.





Aðrir tengdir vefir



Þetta vefsvæði byggir á Eplica