Ráðstefna um umhverfismengun á Íslandi verður haldin á degi vatnsins, föstudaginn 22. mars 2013 á Nauthól í Reykjavík. Áhersla verður lögð á áhrif vatnsnýtingar, landnýtingar og mengunar í vatni og sjó.

Hlýnun í veðurfari veldur breytingu á rennslisháttum vatnsfalla, sérstaklega þeirra sem falla ofan af hálendinu og minnka og vaxa í takt við snjósöfnun og leysingu. Til dæmis hefur veruleg breyting orðið á rennslisháttum Þjórsár og Austari-Jökulsár á síðustu 15 árum. Breytinguna virðist að mestu mega rekja til veðurfarsbreytinga. Hins vegar hefur heildarafrennsli við ósa á vesturhluta landsins ekki aukist. Áhrif miðlunarlóna í Þjórsá virðast mun minni en áhrif sem breytingar í veðurfari hafa haft.

Jöklar við Norður-Atlantshaf hafa hopað og þynnst hratt síðustu árin eins og raunin er með jökla víðast hvar á jörðinni. Grænlandsjökull rýrnar langmest af þeim jöklum sem um er fjallað og minnkaði á árunum 2003-2011 sem nemur um 230 km³ vatns á ári að meðaltali og hækkaði sjávarborð heimshafanna um u.þ.b. 0,65 mm á ári af þeim sökum. Um þetta er fjallað í nýútkominni skýrslu.