Jarðskjálftayfirlit 21.-27. janúar
Skjálftar við Grindavík
144 skjálftar mældust í vikunni. Tiltölulega rólegt var á flestum svæðum á landinu, nema við Grindavík, en þar mældust 58 skjálftar. Flestir urðu þeir þann 23. janúar, eða 51 og voru 2 þeirra af stærðinni 4.
Staðsetning skjálftanna var rétt norð-austur af Grindavík, en einnig mældust 2 litlir skjálftar undir bænum sjálfum.
Fundust stærstu skjálftarnir mjög vel í Grindavík, þar sem að munir féllu úr hillum. Einnig er vitað til þess að þeir hafi fundist í Keflavík.
Skjálftar á þessum slóðum fundust einnig í byrjun júlí árið 2007.
Reykjanesskaginn er mjög virkt jarðskjálftasvæði. Kl. 2 um nóttina, 23. ágúst árið 2003 varð skjálfti í Krísuvík af stærðinni 5 og fannst hann m.a. í Reykjavík.
Hér má lesa frekari umfjöllun um skjálftavirkni vikunnar.
Einnig má skoða skjálftavirknina með aðstoð skjálftavefsjárinnar eða af síðunni skjálftar fyrir Google Earth.
