Fréttir
Frá Ísafirði
Frá Ísafirði 20. mars.

Tíðarfar í mars 2011

Stutt yfirlit

1.4.2011

Tíðarfar var nokkuð umhleypingasamt og þótti jafnvel óhagstætt um vestanvert landið. Hiti í mánuðinum var nærri meðallagi áranna 1961 til 1990. Hiti var lítillega undir meðallagi á Vestfjörðum en ofan við það um landið norðan- og austanvert.

Úrkoma var yfir meðallagi víðast hvar.

Meðalhiti var 0,2 stig í Reykjavík, 0,2 stigum undir meðallagi. Í Stykkishólmi var meðalhitinn -0,8 stig og er það nákvæmlega í meðallagi. Meðalhitinn á Akureyri var -1,0 stig, 0,2 stigum yfir meðallagi. Á Höfn í Hornafirði var meðalhitinn 1,9 stig, 0,7 stigum yfir meðallagi.

Meðalhita og vik á fleiri stöðvum má sjá í sérstakri töflu. Þar er einnig röð mánaðarins meðal hitameðaltala þess tíma sem mælingar hafa verið gerðar á. Raðað er frá hæstum hita.

Meðalhiti í mars 2011 og vik hans frá meðallagi á nokkrum stöðvum.

stöð hiti vik röð af
Reykjavík 0,2 -0,2 80 141
Stykkishólmur -0,8 0,0 80 166
Bolungarvík -2,3 -0,6 77 114
Akureyri -1,0 0,2 62 130
Egilsstaðir -0,6 0,8 17 57
Dalatangi 0,8 0,8 33. til 34. 73
Teigarhorn 0,9 0,5 54. til 56. 139
Höfn í Hornaf. 1,9 0,7
Stórhöfði 1,6 -0,1 77. til 78. 134
Hveravellir -5,8 0,2 24 46


Hæsti meðalhiti mánaðarins á sjálfvirkri stöð mældist í Surtsey, 2,7 stig, en lægstur var meðalhitinn á Þverfjalli -8,0 stig. Á sjálfvirkri stöð í byggð var meðalhitinn lægstur í Svartárkoti, -4,1 stig.

Hæsti hiti í mánuðinum mældist 14,2 stig í Kvískerjum þann 3. Á skeytastöð varð hitinn hæstur 12,6 stig á Skjaldþingsstöðum þann 2.

Lægstur mældist hitinn -25,9 stig við Kolku þann 10. Í byggð mældist lægsti hitinn -20,1 stig í Möðrudal þann 12. Á skeytastöð varð hitinn lægstur -17,2 stig þann 10. á Grímsstöðum á Fjöllum.

Úrkoma

Mánuðurinn var úrkomusamur, í Reykjavík mældist úrkoman 101,5 mm og er það um fjórðungi umfram meðallag. Á Akureyri mældist úrkoman 79.2 mm sem er ríflega 80% umfram meðallag. Á Stórhöfða í Vestmannaeyjum var úrkoma í meðallagi, en 70% umfram meðallag í Stykkishólmi.

Sólskinsstundir

Sólskinsstundir í Reykjavík mældust aðeins 65, það er 46 stundum undir meðallagi og það minnsta í mars síðan 1993. Á Akureyri mældust sólskinsstundirnar 59 og er það 18 stundum undir meðallagi.

Vindhraði og loftþrýstingur

Vindhraði var í meðallagi í mánuðinum en veðurlag þótti þó með órólegra móti miðað við það sem algengast hefur verið undanfarin ár. Helstu illviðradagar voru sá 5. og 14. til 15.

Loftþrýstingur í Reykjavík var í meðallagi.

Snjór

Snjór var meiri um landið sunnan- og vestanvert en verið hefur í marsmánuði undanfarin ár. Talsvert meiri snjór var þó í mars árið 2000, hann lá þá lengur en nú og að auki var hann þá talsvert meiri að magni til. Alhvítir dagar voru 17 í Reykjavík og er það 5 dögum yfir meðallaginu 1971 til 2000. Norðanlands var snjór minni en í meðalári og á Akureyri voru alhvítu dagarnir 15, en eru 19 í meðalmars.

Veturinn (desember 2010 til mars 2011)

Veturinn var mjög hlýr, í Reykjavík 1,1 stigi ofan meðallagsins 1961 til 1990 en í meðallagi sé miðað við síðustu 10 veturna á undan. Á Akureyri var nýliðinn vetur 1,3 stigum yfir meðallagi áranna 1961 til 1990 en í meðallagi áranna 2001 til 2010.

Vetrarúrkoman í Reykjavík var í rétt rúmu meðallagi en þar var mjög þurrt í desember. Á Akureyri var úrkoman um 14% ofan meðallags.

Alhvítir dagar í Reykjavík voru 33 og er það 20 dögum færra en í meðalári. Meira en helmingur þessara daga var í mars. Á Akureyri voru alhvítu dagarnir 69 en það er 15 dögum færra en í meðalári. Í þessum tölum er nóvember undanskildur en þá var alhvítt á Akureyri alla daga nema einn.





Aðrir tengdir vefir



Þetta vefsvæði byggir á Eplica