Tíðarfar í júní 2026

Stutt yfirlit

2.7.2026

Tíðarfar í júní var tiltölulega gott. Á landsvísu var meðalhiti mánaðarins 0,6 stigum yfir meðallagi áranna 1991 til 2020. Hlýjast var á vestanverðu landinu en kaldara austanlands þar sem hiti var undir meðallagi síðustu tíu ára. Júní var úrkomusamur á Norðaustur- og Austurlandi, en úrkoma var nær meðallagi eða undir því á vestanverðu landinu. Loftþrýstingur var óvenjulágur í mánuðinum.

Hiti

Meðalhiti júnímánaðar var 10,6 stig í Reykjavík. Það er 0,8 stigum yfir meðallagi júní árin 1991 til 2020 og 1,1 stigi yfir meðallagi síðustu tíu ára. Á Akureyri var meðalhitinn 10,1 stig, eða 0,5 stigum yfir meðallagi 1991 til 2020 en nærri meðallagi undanfarins áratugar. Meðalhitinn mældist 9,4 stig í Stykkishólmi og 9,6 stig á Höfn í Hornafirði. Meðalhiti í byggðum landsins var 9,2 stig sem er 0,6 stigum yfir meðallagi áranna 1991 til 2020. Meðalhita og vik frá fleiri stöðum má sjá í töflu 1.

 Tafla 1: Meðalhiti og vik (°C) í júní 2026.

stöð	meðalhiti °C	vik m.v. 1991 til 2020 (°C)	röð	af	vik m.v. 2016 til 2025 (°C)
Reykjavík	10,6	0,8	13	156	1,1
Stykkishólmur	9,4	0,5	25 til 26	181	0,5
Bolungarvík	8,3	0,2	44	129	0,1
Grímsey	7,2	0,7	30	153	0,2
Akureyri	10,1	0,5	42	145	0,0
Egilsstaðir	9,3	0,4	24	72	-0,2
Dalatangi	7,4	0,7	15	88	0,2
Teigarhorn	8,3	0,6	23	154	0,1
Höfn í Hornaf.	9,6				0,3
Stórhöfði	9,0	0,4	35	149	0,5
Hveravellir	6,6	0,5	14 til 15	61	0,5
Árnes	10,4	0,4	27 til 29	146	0,6

Hiti var yfir meðallagi áranna 1991 til 2020 á landinu öllu. Ef miðað er við undanfarinn áratug var meðalhiti júnímánaðar víðast hvar yfir meðallagi á vestanverðu landinu en undir meðallagi á því austanverðu. Að tiltölu var kaldast inn til landsins á Austurlandi en hlýjast við Faxaflóa.

Jákvætt hitavik miðað við síðustu tíu ár var mest 1,5 stig í Grindavík og mesta neikvæða hitavikið var -0,9 stig á Eyjabökkum.

Mynd 1: Hitavik (°C) sjálfvirkra stöðva í júní miðað við síðustu tíu ár (2016 til 2025).

Meðalhiti júnímánaðar mældist hæstur 11,2 stig í Hljómskálagarði í Reykjavík en lægstur 2,6 stig á Gagnheiði. Lægsti meðalhitinn í byggð mældist 6,9 stig á Raufarhöfn.

Hæsti hiti mánaðarins mældist 21,0 stig á Egilsstaðaflugvelli þ. 30. Lægstur mældist hitinn -3,3 stig á Gagnheiði þ. 17. Í byggð mældist lægsti hiti mánaðarins -1,6 stig á Þingvöllum þ. 21.

Á mynd 2 má sjá landsmeðalhita hvers dags það sem af er ári 2026, sem vik frá meðalhita síðustu tíu ára. Þar má sjá að landsmeðalhitinn var undir meðallagi í nokkra daga eftir miðjan mánuð en var annars yfir meðallagi í mánuðinum.

Mynd 2: Landsmeðalhiti hvers dags það sem af er ári 2026, miðað við síðustu tíu ár (2016 til 2025).

Úrkoma

Júní var úrkomusamur í norðausturfjórðungi landsins en nær meðallagi eða undir því víðast hvar á vesturhluta landsins. Fjöldi úrkomudaga var þó yfir meðallagi um allt land.

Í Reykjavík mældist mánaðarúrkoman 58,3 mm sem er um 35% yfir meðallagi 1991 til 2020 en nærri meðallagi síðustu tíu ára. Mánaðarúrkoman mældist 38,7 mm á Akureyri, eða 87% umfram meðallag 1991 til 2020 og 26%  umfram meðallag undanfarins áratugar.

Dagar þegar úrkoma var 1,0 mm eða meiri voru 12 í Reykjavík, þremur fleiri en í meðalári. Fjöldi slíkra daga var 14 á Akureyri, eða tíu umfram meðallag árin 1991 til 2020 og hafa aldrei verið fleiri. Árin 1972 og 1984 voru þeir 13.    

Sólskinsstundafjöldi

Í Reykjavík mældist 191,0 sólskinsstund í nýliðnum mánuði, eða 1,5 stund umfram meðallag júnímánaða 1991 til 2020. Sólskinsstundirnar mældust 171,0 á Akureyri sem er 18,9 stundum undir meðallagi.

Vindur

Hægviðrasamt var í mánuðinum og á nokkrum sjálfvirkum stöðvum á landinu hefur ekki mælst lægri meðalvindur í júní en nú. Vindur á landsvísu var 0,4 m/s undir meðallagi áranna 1991 til 2020. Hvassast var 17. og 18. dag mánaðarins (norðaustlægar áttir).

Loftþrýstingur

Meðalloftþrýstingur var lágur miðað við árstíma í mánuðinum og á nokkrum stöðvum mældist lægsti meðalloftþrýstingur júnímánaðar á þessari öld. Meðalloftþrýstingur mánaðarins í Reykjavík mældist 1003,8 hPa, eða 8,8 hPa undir meðallagi 1991 til 2020.

Hæsti loftþrýstingur mánaðarins mældist 1029,2 hPa í Grímsey þ.14. Lægstur mældist loftþrýstingurinn 983,6 hPa á Hraunsmúla á Snæfellsnesi þ. 5.

Fyrstu sex mánuðir ársins

Meðalhiti í Reykjavík fyrstu sex mánuði ársins mældist 3,6 stig, eða 0,1 stigi undir meðallagi 1991 til 2020 og 0,4 stigum undir meðallagi undanfarins áratugar. Meðalhiti mánaðanna sex raðast í 48. hlýjasta sæti á lista 156 ára. Á Akureyri mældist meðalhitinn 2,8 stig sem er um meðallag 1991 til 2020 en 0,4 stigum undir meðallagi síðustu tíu ára. Þar raðast hitinn í  41. hlýjasta sæti á lista 146 ára.

Heildarúrkoma janúar til júní mældist 372,2 mm í Reykjavík, eða 90% af meðalúrkomu áranna 1991 til 2020. Á Akureyri mældust 240,9 mm sem er 5% yfir meðallagi.

Skjöl fyrir júní

Meðalhiti á sjálfvirkum veðurstöðvum í júní 2026 (textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.