Tíðarfar í maí 2026

Stutt yfirlit

2.6.2026

Tíðarfar í maí var tiltölulega gott. Mánuðurinn var þó í svalara lagi, þá sérstaklega fyrri hlutinn. Meðalhiti mánaðarins var undir meðallagi síðustu tíu ára um land allt en nærri meðallagi áranna 1991 til 2020. Það var kaldast inn til landsins á Austurlandi en hlýjast suðvestanlands. Það gerði smá hret í lok mánaðar með kulda og snjó austast til á landinu, að öðru leyti var veður að mestu gott.

Hiti

Meðalhiti nýliðins mánaðar mældist 6,6 stig í Reykjavík. Það er 0,1 stigi undir meðallagi maímánaða árin 1991 til 2020 og 0,6 stigum undir meðallagi undanfarins áratugar. Á Akureyri mældist meðalhitinn 6,0 stig sem er 0,2 stigum undir meðallagi 1991 til 2020 og 1,2 stigum undir meðallagi síðustu tíu ára. Meðalhitinn mældist 5,7 stig í Stykkishólmi og 6,1 stig á Höfn í Hornafirði. Meðalhita og vik frá fleiri stöðum má sjá í töflu 1.

Tafla 1: Meðalhiti og vik (°C) í maí 2026.

Vik meðalhita frá meðaltali síðustu tíu ára voru neikvæð um allt land. Þó var meðalhitinn víða nærri meðallagi áranna 1991 til 2020. Að tiltölu var kaldast inn til landsins á Austurlandi og hlýjast við ströndina suðvestanlands.

Neikvætt hitavik var minnst -0,2 stig í Grindavík en mest -2,7 stig á Kárahnjúkum og Brúaröræfum.

Mynd 1: Hitavik (°C) sjálfvirkra stöðva í maí miðað við síðustu tíu ár (2016 til 2025).

Meðalhiti mánaðarins var hæstur 7,5 stig á Steinum undir Eyjafjöllum en lægstur -2,4 stig á Gagnheiði. Lægsti meðalhiti í byggð mældist 2,3 stig í Svartárkoti.

Hæsti hiti mánaðarins mældist 19,7 stig í Húsafelli þ. 31. Hitinn mældist lægstur -11,2 stig á Gagnheiði þ. 4. og í Setri þ. 2. Lægsti hiti í byggð mældist -10,5 stig þ. 9. á Grímsstöðum á Fjöllum.

Á mynd 2 má sjá meðalhita hvers dags það sem af er ári, sem vik frá meðalhita sama dags undanfarinn áratug. Sjá má að í fyrri hluta mánaðarins var kaldara á landsvísu en að meðallagi síðustu tíu ár alla daga nema einn, en hlýrra var síðari hluta mánaðar, að þriggja daga kuldakasti undir lok mánaðar undanskildu.

Mynd 2: Landsmeðalhiti hvers dags það sem af er ári 2026, miðað við meðallandsmeðalhita hvers dags síðustu tíu ár (2016 til 2025).

Úrkoma

Maí var tiltölulega þurr á mestöllu landinu. Það var þurrast á vestanverðu landinu þar sem úrkoma var vel undir meðallagi en blautara austanlands þar sem úrkoma var rétt yfir meðallagi.  

Í Reykjavík mældist mánaðarúrkoman 28,2 mm sem er 54% af meðalúrkomu áranna 1991 til 2020. Úrkoma í Stykkishólmi mældist 18,1 mm sem er 45% af meðalúrkomu áranna 1991 til 2020. Á Akureyri mældist heildarúrkoma mánaðarins 19,5 mm sem er um 80% af meðalúrkomu. Á Dalatanga mældust 111,0 mm sem er 6% umfram meðalúrkomu áranna 1991 til 2020.

Dagar þegar úrkoma mældist 1,0 mm eða meiri voru 6 í Reykjavík, eða fjórum færri en í meðalári. Í Stykkishólmi voru slíkir dagar 5 sem er þremur færri en í meðalári. Á Akureyri mældist úrkoman 1,0 mm eða meiri 5 daga sem eru jafnmargir og í meðalári. Á Dalatanga voru úrkomudagarnir 13, sem er tveimur fleiri en að meðaltali árin 1991 til 2020.

Snjór

Jörð var alauð allan mánuðinn í Reykjavík og Stykkishólmi, líkt og í meðalári. Á Akureyri voru engir alhvítir dagar skráðir, en 3 flekkóttir dagar í byrjun mánaðar. Á Dalatanga voru 3 alhvítir dagar, tveir í byrjun mánaðar og svo einn þ. 29. En í lok mánaðar kom smá hret á austanverðu landinu og mældist snjór í byggð, m.a. í Neskaupsstað og á Hánefsstöðum í Seyðisfirði.

Sólskinsstundafjöldi

Sólskinsstundir maímánaðar mældust 214,9 í Reykjavík. Það er 5,9 stundum yfir meðallagi. Á Akureyri mældust 180,6 sólskinsstundir í mánuðinum, eða 9,6 stundir umfram meðallag.

Vindur

Vindur á landsvísu mældist 0,3 m/s undir meðallagi áranna 1991 til 2020. Hvassast var þ. 6. (NNA-átt) og 29. (ANA-átt).

Loftþrýstingur

Meðalloftþrýstingur mánaðarins mældist 1013,0 hPa í Reykjavík. Það er um meðallag maímánaða viðmiðunartímabilsins 1991 til 2020.

Hæsti loftþrýstingur mánaðarins mældist 1029,4 hPa á Flateyri þ. 5. Lægstur mældist loftþrýstingurinn 991,6 hPa við Straumnesvita þ. 11.

Fyrstu fimm mánuðir ársins

Meðalhiti fyrstu fimm mánaða ársins mældist 2,2 stig í Reykjavík, en það er 0,3 stigum undir meðallagi áranna 1991 til 2020. Í Reykjavík raðast meðalhitinn hingað til í 56. hlýjasta sæti á lista 156 ára. Á Akureyri mældist meðalhiti janúar til maí 1,4 stig, eða 0,1 stigi undir meðallagi. Þar raðast meðalhiti mánaðanna fimm í 41.hlýjasta sæti á lista 146 ára.

Heildarúrkoma fyrstu fjögurra mánaða ársins mældist 313,9 mm í Reykjavík, sem er um 85% af meðalúrkomu janúar til maí árin 1991 til 2020. Á Akureyri mældist heildarúrkoma mánaðanna fimm 202,2 mm sem er um 96% meðallags 1991 til 2020.

Vorið (apríl og maí)

Vorið var tiltölulega hlýtt. Á landsvísu var meðalhiti vorsins 0,7 stigum yfir meðallagi áranna 1991 til 2020. Apríl var sérlega hlýr og úrkomusamur, en maí fremur svalur og þurr. Talsverður snjór var á landinu um páskana í byrjun apríl.

Meðalhiti vorsins í Reykjavík var 5,5 stig sem er 0,3 stigum yfir meðallagi áranna 1991 til 2020. Vorið er í 41. til 42. sæti yfir hlýjustu vor frá upphafi samfelldra mælinga í Reykjavík 1871.  Í Stykkishólmi var meðalhiti vorsins 5,0 stig sem er 1,0 stigi yfir meðallagi áranna 1991 til 2020. Á Akureyri var meðalhiti vorsins 5,4 stig sem er 1,0 stigi yfir meðallagi. Þar var vorið í 18. til 19. sæti yfir hlýjustu vor frá upphafi mælinga á Akureyri 1881. Meðalhiti vormánaðanna tveggja á Dalatanga var 4,3 stig sem er 1,1 stigi yfir meðallagi áranna 1991 til 2020.

Heildarúrkoma vetrarins í Reykjavík var 127,8 mm sem er 15% umfram meðalúrkomu áranna 1991 til 2020. Á Akureyri mældist heildarúrkoma vormánaðanna tveggja 74,1 mm sem er 50% umfram meðalúrkomu áranna 1991 til 2020. Þar var óvenjulega úrkomusamt í apríl.

Skjöl fyrir maí

Meðalhiti á sjálfvirkum veðurstöðvum í maí 2026 (textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.