Tíðarfar í október 2026
Stutt yfirlit
Október var tiltölulega hlýr og mjög úrkomusamur. Hlýjast var á Norðaustur- og Austurlandi en svalara á suðvesturhluta landsins. Úrkoma var vel yfir meðallagi um allt land og úrkomudagar voru margir. Loftþrýstingur var lágur í mánuðinum og það var nokkuð illviðrasamt. Óvenju djúp lægð gekk yfir landið þ. 14. sem olli talsverðum skemmdum á Siglufirði.
Hiti
Meðalhiti í Reykjavík mældist 5,2 stig í október sem er 0,3 stigum yfir meðallagi áranna 1991 til 2020. Á Akureyri var meðalhitinn í október 4,7 stig sem er 1,2 stigum yfir meðallagi áranna 1991 til 2020. Í Stykkishólmi var meðalhiti mánaðarins 5,5 stig og 6,3 stig á Höfn í Hornafirði. Meðalhiti á landsvísu var 5,0 stig sem er 1,0 stigi yfir meðallagi áranna 1991 til 2020.
Meðalhita og vik frá fleiri stöðum má sjá í töflu 1.
Tafla 1: Meðalhiti og vik (°C) í október 2026.
| stöð | meðalhiti (°C) | vik m.v. 1991 til 2020 (°C) | röð | af | vik m.v. 2016 til 2025 (°C) |
| Reykjavík | 5,2 | 0,3 | 43 | 156 | -0,2 |
| Stykkishólmur | 5,5 | 1,1 | 25 | 181 | 0,5 |
| Bolungarvík | 5,1 | 1,4 | 23 | 130 | 0,7 |
| Grímsey | 5,5 | 1,7 | 9 | 153 | 1,2 |
| Akureyri | 4,7 | 1,2 | 21 | 145 | 1,1 |
| Egilsstaðir | 5,4 | 1,6 | 7 | 72 | 1,4 |
| Dalatangi | 7,0 | 2,0 | 5 | 89 | 1,4 |
| Teigarhorn | 6,3 | 1,3 | 13 | 154 | 1,1 |
| Höfn í Hornaf. | 6,3 | 0,7 | |||
| Stórhöfði | 6,2 | 0,7 | 24 | 150 | 0,2 |
| Hveravellir | 0,2 | 0,8 | 11 til 12 | 62 | 0,3 |
| Árnes | 4,3 | 0,4 | 44 | 147 | 0,1 |
Hiti var yfir meðallagi áranna 1991 til 2020 á öllu landinu. Að tiltölu var hlýjast á Norðaustur- og Austurlandi en kaldast suðvestanlands þar sem meðalhiti októbermánaðar var undir meðallagi síðustu tíu ára (sjá mynd 1). Jákvætt hitavik miðað við síðustu tíu ár var mest 1,4 stig á Mánárbakka, Skjaldþingsstöðum, Egilsstaðaflugvelli og Dalatanga. Neikvætt hitavik var mest -0,4 stig á Hólmsheiði.
Mynd 1: Hitavik (°C) sjálfvirkra stöðva í október miðað við síðustu tíu ár (2016 til 2025).
Meðalhiti mánaðarins var hæstur 7,3 stig á Hvalnesi. Lægstur var meðalhitinn –1,2 stig í Sandbúðum á Sprengisandi. Í byggð var meðalhitinn lægstur 1,2 stig í Möðrudal.
Hæsti hiti mánaðarins mældist 19,5 stig á Siglufirði þ. 1. Mest frost í mánuðinum mældist -17,6 stig í Möðrudal þ. 24.
Á mynd 2 má sjá landsmeðalhita hvers dags það sem af er ári 2026, sem vik frá meðalhita síðustu tíu ára. Í október var landsmeðalhiti undir meðallagi dagana 5. til 7., þann 15. og dagana 21. til 26. Aðra daga októbermánaðar var hiti yfir meðallagi.
Mynd 2: Landsmeðalhiti hvers dags það sem af er ári 2026, miðað við meðallandsmeðalhita hvers dags síðustu tíu ár (2016 til 2025).
Úrkoma
Október var úrkomusamur. Úrkoma var vel yfir meðallagi í öllum landshlutum og úrkomudagar margir.
Í Reykjavík mældist mánaðarúrkoman í október 122,6 mm sem er 54% umfram meðalúrkomu áranna 1991 til 2020. Í Stykkishólmi mældust 125,3 mm sem er 84% umfram meðalúrkomu áranna 1991 til 2020. Á Akureyri mældist heildarúrkoma mánaðarins 108,4 mm sem er 47% umfram meðalúrkomu. Á Dalatanga mældist mánaðarúrkoman 378,9 mm sem er 84% umfram meðalúrkomu áranna 1991 til 2020. Þar hefur ekki mælst eins mikil úrkoma í októbermánuði síðan 2001.
Dagar þegar úrkoma mældist 1,0 mm eða meiri voru 20 í Reykjavík, eða 7 fleiri en að meðaltali árin 1991 til 2020. Í Stykkishólmi voru slíkir dagar 18, sem er 6 fleiri en í meðalári. Á Akureyri mældist úrkoman 1,0 mm eða meiri 11 daga í október, sem er í meðallagi. Á Dalatanga voru úrkomudagarnir 17, sem er 1 fleiri en að meðaltali árin 1991 til 2020.
Snjór
Jörð var alauð alla morgna í október í Reykjavík líkt og í meðalári. Á Akureyri var alhvítt einn morgun í október sem er tveimur dögum færra en að meðaltali árin 1991 til 2020.
Sólskinsstundafjöldi
Sólskinsstundir í Reykjavík mældust 82,6 í október sem er 9,0 stundum undir meðallagi áranna 1991 til 2020. Á Akureyri mældust sólskinsstundirnar 62,8 sem er 14,9 stundum yfir meðallagi.
Vindur
Vindur á landsvísu var 0,2 m/s undir meðallagi áranna 1991 til 2020. Talsvert var þó um illviðri í mánuðinum. Hvassast var þ. 1. (SA-átt), þ. 14. (A- og N-átt) og dagana 17.-18. (S- og SV-átt). Talsverð úrkoma fylgdi þessum veðrum.
Hvassviðrið þ. 14. olli miklum skemmdum á Siglufirði. Þar fuku m.a. þök af þremur húsum og brak frá þeim og öðrum lausamunum olli foktjóni víða í bænum.
Loftþrýstingur
Loftþrýstingur var lágur í október. Meðalloftþrýstingur í Reykjavík mældist 994,8 hPa sem er 9,5 hPa undir meðallagi áranna 1991 til 2020. Mánaðarmeðalþrýstingur í október hefur ekki verið svona lágur síðan árið 2011.
Lægðin sem gekk yfir landið þ. 14. var óvenju djúp. Loftþrýstingur fór lægst í 934,6 hPa á Fagurhólsmýri sem var lægsti loftþrýstingur sem mældist í mánuðinum og jafnframt lægsti loftþrýstingur sem mælst hefur í októbermánuði. Fyrra met var 938,4 hPa á Stórhöfða þ. 19. október 1963.
Hæsti loftþrýstingur mánaðarins mældist 1024,4 hPa á Önundarhorni þ. 17.
Fyrstu tíu mánuðir ársins
Meðalhiti í Reykjavík fyrstu tíu mánuði ársins mældist 5,7 stig sem er 0,2 stigum undir meðallagi áranna 1991 til 2020, en 0,4 stigum undir meðallagi síðustu tíu ára. Meðalhiti mánaðanna tíu raðast í 42. hlýjasta sæti á lista 156 ára. Á Akureyri mældist meðalhitinn 5,3 stig sem er 0,3 stigum yfir meðallagi áranna 1991 til 2020 en 0,1 stigi undir meðallagi síðustu tíu ára. Þar raðast hitinn í 22. hlýjasta sæti á lista 146 ára.
Heildarúrkoma fyrstu tíu mánuði ársins mældist 748,0 mm í Reykjavík sem er 10% umfram meðalúrkomu áranna 1991 til 2020. Á Akureyri mældist heildarúrkoma janúar til október 468,9 mm sem er 10% umfram meðalúrkomu líkt og í Reykjavík.
Skjöl fyrir október
Meðalhiti á sjálfvirkum veðurstöðvum í október 2026 (textaskjal).
