Laus störf

Sérfræðingur í hættumati með áherslu á snjóflóð og skriður

Viltu taka þátt í að auka öryggi og áfallaþol samfélaga og byggða?

Veðurstofa Íslands leitar að metnaðarfullum og áhugasömum sérfræðingi til að slást í hóp okkar á ofanflóðadeildinni. Ef þú hefur áhuga á hættumati og að taka þátt í spennandi rannsóknum og þróunarverkefnum, þá er þetta tækifærið fyrir þig.

Deildin sinnir mikilvægum verkefnum tengdum snjóflóðum og skriðuföllum og ber ábyrgð á faglegri þróun og stefnumótun á sviði ofanflóða. Unnið er að hættumati, líkanreikningum, vörnum gegn snjóflóðum og skriðuföllum, alþjóðasamstarfi sem og ráðgjöf og miðlun upplýsinga. Hluti starfsmanna deildarinnar sinnir einnig vöktun á ofanflóðahættu.

Þetta er krefjandi og fjölbreytt starf þar sem þú getur haft raunveruleg áhrif.

Boðið er upp á ákveðinn sveigjanleika í staðsetningu en starfið getur verið á einni af eftirfarandi starfsstöðvum Veðurstofunnar: Ísafirði, Akureyri, Neskaupstað eða Reykjavík.

Helstu verkefni og ábyrgð

Sérfræðivinna við gerð hættumats vegna ofanflóða. Miðlun upplýsinga og samtal við sveitarfélög, skipulagsyfirvöld og aðra hagsmunaaðila. Vinna við eðlisfræðilíkön, þróun hættumatsaðferða og þátttaka í rannsóknarverkefnum. Verkefnisstjórn tilgreindra verkefna eftir atvikum.

Hæfniskröfur

  • Háskólapróf á sviði raunvísinda, verkfræði eða sambærileg menntun sem nýtist í starfi. Framhaldsmenntun æskileg

  • Góð kunnátta í landupplýsingakerfum (LUK) er nauðsynleg

  • Kunnátta í forritun og reynsla af líkanreikningum er æskileg

  • Þekking á hættumati tengdu náttúruvá er kostur

  • Þekking og reynsla á notkun líkinda- og tölfræði í starfi er kostur

  • Þekking á íslenskri náttúru og áhugi á viðfangsefninu

  • Hæfni í mannlegum samskiptum

  • Geta til að vinna sjálfstætt og móta flókin verkefni

  • Góð tungumálakunnátta og færni til að miðla upplýsingum í ræðu og riti á íslensku og ensku.

  • Farsæl reynsla í verkefnastjórnun er kostur

Gildi Veðurstofunnar eru þekking, áreiðanleiki, framsækni og samvinna. Ráðningar hjá stofnuninni taka mið af þessum gildum.

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Við hvetjum fólk af öllum kynjum til að sækja um.

Umsókninni þarf að fylgja ferilskrá og kynningarbréf þar sem gerð er grein fyrir ástæðu umsóknar og hæfni viðkomandi til að gegna starfinu rökstudd.

Á þjónustu- og rannsóknasviði fer fram þekkingaröflun, rannsóknir, veðurþjónusta, náttúruvárvöktun og miðlun upplýsinga. Tilgangur sviðsins er að mæta þjónustuþörf samfélagsins í samræmi við hlutverk Veðurstofunnar og vinna fjórar deildir að verkefnum sviðsins með eftirfarandi faglegar áherslur:

  • Veðurspár og náttúruvárvöktun.

  • Loftslag, veður, vatn, jöklar og haf.

  • Eldvirkni, jarðskjálftar og jarðhnik.

  • Snjóflóð og skriður.

Sviðið ber ábyrgð á að móta og fylgja eftir þjónustustefnu Veðurstofunnar sem stuðlar að upplýstri og vandaðri ákvarðanatöku á sviði náttúruvár, náttúruverndar og nýtingar auðlinda.. Sviðið er eitt tveggja kjarnasviða stofnunarinnar.

Veðurstofa Íslands er opinber stofnun sem heyrir undir umhverfis- og auðlindaráðuneytið. Höfuðstöðvar Veðurstofunnar eru í Reykjavík, en starfsstöðvar eru einnig í Keflavík, á Ísafirði, Akureyri og í Neskaupstað. Hjá stofnuninni starfa um 170 manns, með fjölbreytta menntun og starfsreynslu sem spannar mörg fræðasvið. Auk þess starfa um 50 manns við athugana- og eftirlitsstörf víðsvegar um landið. Hlutverk stofnunarinnar er öflun, varðveisla og úrvinnsla gagna, sem og miðlun upplýsinga á helstu eðlisþáttum jarðarinnar, þ.e. lofti, vatni, jörð, snjó, jöklum og hafi.

Nánari upplýsingar er að finna á www.vedur.is

Starfshlutfall er 100%

Umsóknarfrestur er til og með 16.04.2025

Sækja um hér

Nánari upplýsingar veitir

Harpa Grímsdóttir, harpa@vedur.is

Borgar Ævar Axelsson, borgar@vedur.is


Nýjar fréttir

Landris heldur áfram í Svartsengi en dregið hefur úr hraða þess

Uppfært 22. apríl kl: 11:50

Landris í Svartsengi heldur áfram, en töluvert hefur dregið úr hraða þess og er nú svipað og fyrir eldgosið sem hófst 1. apríl.  Á meðan að kvikusöfnun heldur áfram undir Svartsengi þarf að reikna með endurteknum kvikuhlaupum og jafnvel eldgosum á Sundhnúksgígaröðinni.

Veðurstofan heldur áfram að fylgjast með þróun kvikusöfnunarinnar og að meta mögulegar sviðsmyndir út frá nýjustu gögnum.

Lesa meira

ICEWATER verkefnið hafið

Um 80 manns tóku þátt á fyrsta fundi í ICEWATERverkefninu, sem haldinn var dagana 24. og 25. mars 2025 í húsnæði Orkuveitu Reykjavíkur í Elliðaárdalnum í Reykjavík. Fundurinn markaði upphaf þessa metnaðarfulla verkefnis, sem miðar að því að flýta fyrir og bæta innleiðingu vatnaáætlunar á Íslandi.

Lesa meira

Landris heldur áfram í Svartsengi

Uppfært 8. apríl kl. 15:10

Aflögunargögn sýna skýrt merki um að landris haldi áfram undir Svartsengi. Landris mælist nú hraðara en eftir síðustu eldgos. Það gæti skýrst af því hversu mikið rúmmál kviku fór úr kerfinu í þessum síðasta atburði.

Hins vegar er enn of snemmt að segja til um áframhaldandi þróun á hraða kvikusöfnunarinnar. Reynsla frá fyrri atburðum sýnir þó að hraði kvikusöfnunar minnkar yfirleitt eftir því sem líður á kvikusöfnunartímabilið milli gosa. Bíða þarf í allavega viku, mögulega nokkrar vikur, til að segja til um hvort og þá hversu mikið hraði kvikusöfnunar mun breytast.

Lesa meira

Bætt þjónusta Veðurstofu Íslands við útvarpshlustendur

Þann 1. apríl 2025 voru gerðar smávægilegar en gagnlegar breytingar á útvarpslestri veðurfrétta frá Veðurstofu Íslands á RÁS 1. Tímasetningar veðurfregna haldast óbreyttar, en innihaldið hefur verið tilsniðið til að veita hlustendum betri og markvissari þjónustu.

Lesa meira

Tíðarfar í mars 2025

Mars var hlýr og hægviðrasamur um allt land. Úrkomulítið var norðaustanlands en úrkomusamara á vestanverðu landinu. Nokkuð sólríkt var bæði í Reykjavík og á Akureyri. Hvassviðri í upphafi og lok mánaðar ollu vandræðum. Veðrinu þ. 3. og 4. fylgdu sjávarflóð á suðvesturhorni landsins, en þ.30 varð mikið þrumuveður á sunnanverðu landinu.

Lesa meira




Aðrir tengdir vefir



Þetta vefsvæði byggir á Eplica