Ágúst 2003

Trausti Jónsson

Nýliðinn ágústmánuður var óvenju hlýr um land allt. Í Reykjavík var hann sá hlýjasti síðan samfelldar og samanburðarhæfar mælingar hófust 1871. Meðalhiti var 12,8°C og er það 2,5°C yfir meðallagi áranna 1961-1990. Næsthlýjastur var ágúst 1880 með 12,4°C. Á Akureyri var meðalhitinn einnig 12,8°C og er það 2,8°C yfir meðallagi. Á Akureyri er vitað um einn hlýrri ágúst, það var 1947 en meðalhiti þá var 13,2°C. Ómarktækur munur er á ágúst nú og ágúst 1939 og 1936, en samfelldar mælingar á Akureyri hófust 1881. Í Akurnesi var meðalhitinn 12,3°C en á þeim stað hefur aðeins verið mælt í rúm 10 ár. Á Hveravöllum var meðalhitinn 9,8°C, þar hefur hitinn ekki orðið hærri í ágúst og aðeins einu sinni í júlí, 1991. Bráðabirgðaniðurstöður benda til þess að mánuðurinn sé hlýjasti ágúst í Stykkishólmi, þar var byrað að mæla 1845 og var næsthlýjast í ágúst 1880 eins og í Reykjavík. Í Vestmannaeyjum er mánuðurinn einnig hinn hlýjasti frá upphafi mælinga 1877 (1880 næsthlýjastur). Í Bolungarvík var álíka hlýtt í ágúst 1947 og á Raufarhöfn hlýrra en nú bæði 1939 og 1947 og á Dalatanga var ívið hlýrra 1947 og 1955 en nú.
Úrkoma í Reykjavík mældist 76 mm og er það um 20% umfram meðallag, á Akureyri mældist úrkoman 38 mm og er það um 10% umfram meðallag. Í Akurnesi mældist úrkoman 123 mm og 59mm á Hveravöllum.
Sólskinsstundir í Reykjavík mældust 158 og er það í meðallagi, en á Akureyri mældust sólskinsstundirnar aðeins 110 og er það 26 stundum minna en í meðalári.
Mánuðirnir júní til ágúst eru samtals þeir hlýjustu í Reykjavík frá upphafi mælinga (12,1°C), næst koma sömu mánuðir 1880 og 1939 með 11,7° og 11,6°C. Á Akureyri voru þessir mánuðir heldur hlýrri 1933 en nú og svipaðir 1955, 1976 og 1984 en öll þau sumur var stöðug rigning um sunnanvert landið.

Til baka, Senda grein, Prenta greinina

 




Aðrir tengdir vefir



Ekkert skjal tengt
Þetta vefsvæði byggir á Eplica